एकीकृत समाजवादीका कोशी प्रदेश अध्यक्षसहित ४ जनाविरुद्ध भ्रष्टाचार मुद्दा

१० असोज, काठमाडाैं । नेकपा (एकीकृत समाजवादी) पार्टीका कोशी प्रदेश अध्यक्ष बलदेव चौधरीविरुद्ध भ्रष्टाचार मुद्दा दर्ता भएको छ । उदयपुरको त्रियुगा नगरपालिकाका तत्कालीन नगर प्रमुखसमेत रहेका चौधरीविरुद्ध अख्तियार दुरुपयोग अनुसन्धान आयोगले बुधबार विशेष अदालतमा भ्रष्टाचार मुद्दा दायर गरेको हो ।

अख्तियारले नगरपालिकाका तत्कालीन नि. प्रमुख प्रशाकीय अधिकृत किरणकुमार कार्की, नायव सुब्बा गुरु ढकाल र ठेकेदार राजेश बछारविरुद्ध पनि भ्रष्टाचार मुद्दा दर्ता गराएको छ । उनीहरु सबैजनालाई राजश्व चुहावट गरी भ्रष्टाचार गरेको आरोप छ ।

चौधरीसहितको टोलीले आर्थिक वर्ष २०७८/७९ मा ढुङ्गा, गिटी, ग्राभेल, रोडा, बालुवा उत्खनन संकलन तथा बिक्री गरी कर उठाउने ठेक्कामा मिलेमतोमा बदनियतपूर्वक राजस्व हानिनोक्सानी गरेको उजुरीका आधारमा अनुसन्धान सकेर मुद्दा दायर गरिएको अख्तियारले जनाएको छ । 

अध्यक्ष चौधरीले ८१ लाख ३५ हार ३ सय ८२ रुपैयाँ १६ पैसा, भरौटे र बलौटेले  १८ लाख ४४ हजार १७७ रुपैयाँ ९४ पैसा र बछारले ३६ लाख ८८ हजार ३५५ रुपैयाँ ८८ पैसा भ्रष्टाचार गरेको अख्तियारको दाबी छ । आरोपीमाथि बिगो र उतिनै अंकमा वरिवाना र कैद हुनुपर्ने माग गरिएको छ ।