मल कारखानाका लागि विस्तृत अध्ययन गर्न मलेसियन कम्पनीसँग सम्झौता

१० असोज, काठमाडौं । नेपालमा मल कारखाना स्थापनाको सम्भाव्यता अध्ययनका लागि मलेसियन कम्पनीसँग सम्झौता भएको छ । लगानी बोर्ड र मलेसियाको रिनिकोला एसडीएन बीएचडीबीच ग्रीन क्याल्सियम एमोनियम नाइट्रेड मल कारखाना स्थापनका लागि समझदारीमा पत्रमा हस्ताक्षर भएको हो । 

सम्झौतापत्रमा लगानी बोर्डका प्रमुख कार्यकारी अधिकृत सुशील भट्ट र रिनिकोलाका प्रबन्ध निर्देशक बौमहिदी अब्देलालीले बुधबार समझदारीपत्रमा हस्ताक्षर गरेका छन् । सम्झौता कम्पनीले २४ महिनाभित्र मल कारखाना स्थापना सम्बन्धी विस्तृत अध्ययन गरेर प्रतिवेदन तयार गर्नुपर्नेछ ।

सरकारले नेपालमै मल कारखाना बनाउने नीति चालू आर्थिक वर्षको बजेटमा उल्लेख गरेको छ । त्यसनिम्ति अध्ययनका लागि बजेट समेत छुट्याइएको छ ।