उपचार अभावमा माओवादी केन्द्र सुदूरपश्चिम उपाध्यक्ष बडुवालको निधन

११ असोज, काठमाडौं । उपचारको अभावमा नेकपा (माओवादी केन्द्र) सुदूरपश्चिम प्रदेश समितिका उपाध्यक्ष कृष्ण बडुवाल ‘महेश’को निधन भएको छ । पार्टीले भदौ १६ देखि संचालन गरिरहेको अभियानको क्रममा डोटीमा खटिएका महेशको निमोनियाबाट मृत्यु भएको हो । 

स्वास्थ्यमा समस्या देखिएपछि पनि समयमै उपचार हुन नसक्दा मृत्यु भएको परिवार स्रोतले जनायो । उनलाई गम्भीर अवस्थामा मात्र गृहजिल्ला कैलाली फर्काइएको थियो । धनगढीमा उपचार हुन नसकेपछि थप उपचारका लागि भारतको लखनउ लैजाने क्रममा बुधबार राति बाटोमै ज्यान गएको परिवारका सदस्यले बताए ।

लम्किचुहा नगरपालिका-२ चौरी घर भएका उनी जनयुद्धकालमा सुर्खेत जेल ब्रेक गरेका नेतामध्येका एक थिए । उनको श्रीमती र एक छोरा २०७१ असोज २० मा डोटीको छतिवनमा भएको बस दुर्घटनामा निधन भएको थियो ।