सरकारले सुरक्षाको ग्यारेन्टी दिएर काममा फर्कन आग्रह गर्दा पनि डाक्टरहरु सडकमा [ फोटो फिचर ]

११ असोज, काठमाडौं । सरकारले सुरक्षाको ग्यारेन्टी गर्दै काममा फर्कन आग्रह गरेपनि चिकित्सकहरुले आन्दोलनलाई निरन्तरता दिएका छन् । उनीहरुले आज पनि आन्दोलन जारी राखेका छन् । सुरक्षा दिन नसकेको भन्दै उनीहरुले गृहमन्त्री र स्वाथ्य मन्त्रीको राजीनामा माग्दै नारावाजी गरेका छन् । 

असोज ९ गते उपप्रधानमन्त्री एवं गृहमन्त्री नारायणकाजी श्रेष्ठ, स्वास्थ्य तथा जनसंख्यामन्त्री मोहनबहादुर बस्नेत र सम्बन्धित सरोकारवाला निकायका प्रतिनिधिको उपस्थितिमा बसेको बैठकले गरेका निर्णय कार्यान्वयनका लागि स्वास्थ्य तथा जनसंख्या मन्त्रालय, नेपाल प्रहरी प्रधान कार्यालय र सबै जिल्ला प्रशासन कार्यालयमा पत्राचार गरि सकिएको छ ।   

कास्कीमा घटेको घटनामा दोषी देखिएका सुरक्षाकर्मीमध्ये एक जनालाई केन्द्रमा सरुवा गरि सकिएको र अर्का एक जनालाई कानुन बमोजिम निलम्बनसमेत गरि सकिएको छ । गृह मन्त्रालयले स्वास्थ्य सेवाजस्तो संवेदनशील क्षेत्रमा कार्यरत स्वास्थ्यकर्मीलाई सबै प्रकारका विरोधका कार्यक्रम अन्त्य गरी आफ्नो जिम्मेवारी र कर्तव्य निर्वाह गर्दै आ–आफ्नो कार्यक्षेत्रमा फर्किन आह्वान गरिरहेको छ ।

तर, गृहमन्त्री र स्वास्थ्य मन्त्रीको राजीनामा माग गर्दै चिकित्सकहरुले बिहीबार पनि काठमाडौंमा विरोध प्रदर्शन गरेका छन् । आफुहरुमाथि पटक पटक आक्रमण हुँदा पनि सरकारले सुरक्षा प्रदान गर्न नसकेको भन्दै उनीहरूले गृहमन्त्री र स्वास्थ्यमन्त्रीको राजीनामा मागका साथ विरोध प्रदर्शन गरेका हुन् ।

उनीहरूले स्वास्थ्यकर्मी तथा स्वास्थ्य संस्थाको सुरक्षा सम्बन्धी पहिलो संशोधन ऐन २०७९ अविलम्ब कार्यान्वयन गर्नुपर्ने माग राखेका छन् । आफ्नो ज्ञान विवेक प्रयोग गरेको उपचार गर्दा पनि चिकित्सकमाथि लगातार आक्रमण भएको र सुरक्षाको प्रत्याभूति नभएकाले बाध्य भएर उपचार सेवा छाडेर आन्दोलनमा आउनुपरेको उनीहरूको भनाइ छ ।  

आन्दोलनरत चिकित्सकहरूले हामी स्वास्थ्यकर्मी एक हौ, स्वास्थ्य क्षेत्रमा राजनीतिक हस्तक्षेप बन्द गर, हजुरको आसु हामीले हेर्ने, हाम्रो आसु कस्ले हेर्ने लगाएतका प्लेकार्ड प्रदर्शन गरेका थिए । चितवन पोखरा लगाएतका स्थानमा चिकित्सकमाथि भएका आक्रमणको विरोध गर्दै चिकित्सकहरू आन्दोलित भएका हुन् ।