स्वास्थ्य सेवा बन्द नहुने वातावरण बनाउन मानव अधिकार आयोगद्वारा सरकारको ध्यानाकर्षण

११ असोज, काठमाडौं । राष्ट्रिय मानव अधिकार आयोगले नागरिकको हकमा अत्यावश्यकीय सेवा स्वास्थ्य संस्थामा सेवा बन्द नहुने वातावरण बनाउन सरकारको ध्यानाकर्षण गराएको छ ।

सुरक्षको माग गर्दै चिकित्सकहरुले अस्पतालहरुमा सेवा बन्द गर्ने क्रम नरोकिएपछि आयोगले फिल्ड अनुगमन सकेर आज सरकारको ध्यानाकर्षण गराएको हो । 

पछिल्ला केही दिनयता कास्की, मकवानपुर, लमजुङ, चितवन लगायत जिल्लाहरुका विभिन्न अस्पतालहरुमा कार्यरत चिकित्सकहरुमाथि भएका आक्रमण, दुर्व्यवहार तथा स्वास्थ्य संस्थाहरुमा भएको तोडफोड घटनाको विरोधमा चिकित्सक, नर्सहरुले आकस्मिकबाहेकका स्वास्थ्य सेवा बन्द गरी आन्दोलनमा उत्रिँदा नागरिकको स्वास्थ्य उपचारमा गम्भीर असर परेको आयोगले जनाएको छ ।

आक्रमणकारीमाथि कारवाहीको माग गर्दै आज पनि चिकित्सकहरुले काठमाडौं लगायत जिल्लाहरुमा प्रदर्शन जारी राखेका छन् । आक्रामण घटनामध्ये हेटौंडाको सन्चो अस्पतालमा चिकित्सकमाथि आक्रमण गरेको आरोपमा प्रहरीले २ महिलासहित ७ जनालाई पक्राउ गरी अनुसन्धान गरिरहेको छ ।