बलात्कार मुद्दामा श्रीलंकाका क्रिकेटर दनुस्का निर्दोष ठहर

११ असोज, काठमाडौं । श्रीलंकन ब्याटर दनुस्का गुनाथिलकालाई बलात्कार सम्बन्धी मुद्दामा अदालतले निर्दोष ठहर गरेको छ । बिहीबार अष्ट्रेलियाको सिड्नीस्थित डाउनिङ सेन्ट्रल डिस्ट्रिक कोर्टले उनलाई निर्दोष ठहर गर्दै सफाइको फैसला सुनाएको हो । 

३२ वर्षीय दनुस्कालाई अब खेलमा फर्किनृ बाटो खुला भएको छ । उनीविरुद्ध २९ वर्षीया एक महिलाले आफूलाई बलात्कार गरेको आरोप लगाउँदै मुद्दा हालेकी थिइन् । टिन्डर डेटमार्फत चिनजान भएका दनुस्काले नोभेम्बरमा आफ्नो घरमा आएर आफूलाई बलात्कार गरेको महिलाको दाबी थियो । उनले दनुस्कामाथि थुप्रै आरोप लगाएकी थिइन् । तर सहमति बिना कण्डम हटाएको आरोपमाथि मात्र छानबिन भएको थियो ।

न्यायाधीश रारा हगेटको इजलासमा भएको सुनुवाइका क्रममा उजुरीकर्ता महिलाले आफूले सुरक्षित यौन सम्बन्धका लागि मात्र सहमति दिइएको तर दनुस्काले आफूले नदेख्ने गरी कन्डम हटाएको बताएकी थिइन् ।  ती महिलाले दनुस्कामाथि जबरजस्ती चुम्बन गरेको, कयौं पटक जोडले दबाएका कारण ज्यानको खतरा महसुस गरेको दाबी गरेकी थिइन् । सुनुवाइमा बसेका दनुस्काले सबै आरोप अस्वीकार गरेका थिए ।

दनुस्काले प्रहरीले सोधेको हरेक प्रश्नको जवाफ सहज र नदोहोर्याएर दिएको र सो क्रम अदालतमा पनि कायम राखेको, तर महिलाले भने प्रहरीलाई बयान फेरि फेरि दिएको र अदालतमा पनि फरक वकपत्र गरेको इजलासको ठहर गरेको छ । ८ टेष्टसहित १०० भन्दा बढी म्याच खेलिसकेका दनुस्का बलात्कारको आरोपमा गत वर्ष अक्टाेबरमा सिड्नीबाट पक्राउ परेका थिए । पक्राउपछि उनी निलम्बनमा परेका थिए । 

यस्तै बलात्कार घटनाको मुद्दा हाल नेपाली क्रिकेटर सन्दीप लामिछानेविरुद्ध पनि चलिरहेको छ । काठमाडौं जिल्ला अदालमा मुद्दाको अन्तिम सुनुवाइ हुने क्रममा रहेको छ । आइतबार अन्तिम सुनुवाइका लागि पेशी तोकिए पनि न्यायाधीश अभाव देखाएर सुनुवाइ स्थगन गरेको थियो । त्यसपछि लामिछाने मंगलबार एसियाडमा नेपाली क्रिकेट टोलीबाट खेल्न चीनको हाङझाउ गएका छन् ।