विप्लव पुत्र प्रकाशले कसे डा. मान्यतासँग लगनगाँठो

११ असोज, काठमाडौं । नेकपाका महासचिव नेत्रविक्रम चन्द ‘विप्लव’का पुत्र प्रकाश चन्द र चिकित्सक मान्यता थापाबीच विवाह भएको छ । बिहीबार कपिलवस्तुको शिवगढीस्थित पार्टीका केन्द्रीय कार्यालयमा दुई जनाबीच प्रगतिशील विवाह भएको हो । 

चिकित्सक पेसामा रहेका प्रकाशले पार्टीमै रहेकी चिकित्सक सेवामा सक्रिय चिकित्सक मान्यतासँग विवाह गरेका हुन् । पार्टीले चिकित्सा शिक्षा सुधारका लागि चलाएको संघर्षमा चितवन मेडिकल कलेजविरूद्धकाे संघर्षमा दुवै जना सँगसँगै खटिएका थिए । प्रकाश हाल पार्टीनिकट जन स्वास्थ्यकर्मी संघका महासचिव हुन् । 

विवाह समारोहमा पार्टीका महासचिव विप्लव लगायत शिर्षस्थ नेता, शुभेच्छुक, परिवारका सदस्यहरुको सहभागिता रहेको थियो । समाजलाई रुपान्तरणको दिशामा योगदान दिने उद्देश्यले परम्परागत विवाह प्रणालीलाई छाडेर दुई जनाले प्रगतिशील विवाह राेजेको उनीहरुले बताएका छन् ।

विवाह समाराेहमा दुलह, दुलहीले भाषण गरे । कुरिती र कुसंस्कार हटाउन प्रगतिशील विवाहले सहयाेग पुर्याउने तर्क गरे । लाखाैं रूपैयाँ खर्च गरेर विहे गर्ने तरिका ठीक नभएकाे समेत उनीहरूले भाषणमा भने । उनीहरूले कार्यालय परिसरमा वृक्षाराेपण समेत गरे । 

विवाह समारोहमा उद्घोषकले दुलहलाई प्रकाश सी र दुलहीलाई मान्यता सी भनेर सम्बोधन गरेका थिए । दुलह दुलहीलाई पार्टीको तर्फबाट विवाहको प्रमाण प्रदान गरेपछि महासचिव विप्लवले आफ्नो सम्बोधनका क्रममा विवाहलाई ‘सी विवाह’को सज्ञा दिएका थिए ।

नेकपाको गत वर्ष शिवगढीमै भएको नवौ महाधिवेशनले पार्टीका नेता कार्यकर्तालाई पूर्णरुपमा कम्युनिष्ट व्यवहार, संस्कार र आचरणमा बदल्ने भन्दै नामको पछाडि सी जोडने र बोलाउँदा, सम्बोधन गर्दा सी थरबाट गर्ने निर्णय गरेको थियो ।

विवाह पार्टी कार्यालयमा गरेका उनीहरूकाे भाेज भने पार्टी प्यालेसमा भएकाे छ । भाेजमा पहुनालाइ बाेलाउने निमन्त्रणा कार्ड भने झकिझकाउ र महंगा कागजमा प्रिन्ट गरेर बाँडेकाे पाइएकाे छ ।