एमाले बागमती अध्यक्षका उम्मेदवार संख्या ४ मा झरयो

११ असोज, काठमाडौं । नेकपा (एमाले) बागमती प्रदेश अध्यक्षका उम्मेदवारहरु ५ जनामध्ये केशवराज पाण्डेले उम्मेदवारी फिर्ता लिएका छन् । आन्तरिक छलफलमा नेताहरुको दबाबपछि उनले आज दिउँसो उम्मेदवारी फिर्ता लिएका हुन् । उनले कैशाल ढुंगेललाई समर्थन गर्ने भएका छन् । ढुंगेल पार्टी अध्यक्ष केपी शर्मा ओली पक्षका हुन् । 

अध्यक्षका लागि अझै ४ जनाको उम्मेदवार कायम छ । मुख्य प्रतिस्पर्धा ढुंगेल र कृष्णप्रसाद दाहालबीच हुने देखिएको छ । निर्वाचनबाट प्रदेशको नयाँ नेतृत्वसहित प्रदेश कमिटी चयन गर्नेछ । कमिटीको क्लष्टरतर्फ ३ सदस्य निर्विरोध भइसकेका छन् ।

यस्तै एमालेको कर्णालीको अधिवेशनमा निर्वाचन हुने भएको छ । बुधबारदेखि सुरु भएको अधिवेशनमा नेताहरुले सहमतिको प्रयास गरेपनि जुटन नसकेपछि मतदानबाटै प्रदेश नेतृत्व चयन गर्नुपर्ने अवस्था आएको हो । यहाँ नेताद्वय गुलाबजंग शाह र मीनबहादुर शाहीबीच प्रतिस्पर्धा हुने निश्चितप्रायः छ ।

यसअघि सहमति जुट्न नसक्दा लुम्बिनी प्रदेश कमिटी पनि निर्वाचनबाटै टुंगाे लगाइएकाे थियाे ।