भारतीय कम्पनीले पाएको फुकोट कर्णालीको ईआईए स्वीकृतिको प्रक्रिया सुरु

११ असोज, काठमाडौं । भारतीय कम्पनी एनएचपीसी लिमिटेडलाई निर्माणको जिम्मा दिएको फुकोट कर्णाली जलविद्युत आयोजनाको वातावरणीय प्रभाव मूल्यांकन (ईआर्यए) प्रतिवेदन स्वीकृतिको प्रक्रिया अघि बढेको छ ।

विद्युत उत्पादन कम्पनीले लिमिटेडले अध्ययन गरेको आयोजनाको ईआईए स्वीकृतिका लागि वन तथा वातावरण मन्त्रालय पठाइएको छ । मन्त्रालयले स्वीकृतिका लागि आयोजना निर्माण र सञ्चालन गर्दा कुनै प्रतिकूल असर पर्ने भए ७  दिनभित्र राय र सुझाव पेस गर्न आग्रह गरेको छ । 

४८० मेगावाट जडित क्षमता भएको प्रस्तावित आयोजना कालिकोटको पचाल झरना गाउँपालिका, रास्कोट नगरपालिका, सान्‍नी त्रिवेणी गाउँपालिका र खाडाचक्र नगरपालिका भएर बग्‍ने कर्णालीमा नदीमा निर्माण हुँदैछ । यो अर्ध जलाशय प्रकृतिको हुनेछ । आयोजना निर्माण थालेको ५ वर्षमा उत्पादन थाल्ने लक्ष्य लिएको छ । आयोजनामा करिब ९३ अर्ब रुपैयाँ लाग्ने अनुमान गरिएको छ । लगानी एनएचपीसीले नै जुटाउने सर्त छ ।

प्रधानमन्त्री पुष्पकमल दाहाल ‘प्रचण्ड’को गत असारको तेस्रो साता भएको भारत भ्रमणका क्रममा फुकोट कर्णाली निर्माण गर्न एनएचपीसीसँग सम्झौता गरिएको थियो । एनएचपीसीलाई ५१ प्रतिशत सेयर दिइएको छ भने ४९ प्रतिशत सेयर विद्युत उत्पादन कम्पनीको नाममा रहने व्यवस्था गरिएको छ । गत जेठ १७ गते आयोजना विकासका लागि द्धिपक्षीय सम्झौता (एमओयु) भएको थियो । 

उत्पादित बिजुली ४०० केभी प्रसारण लाइनमार्फत भारत लैजाने भनिएको छ । नेपालले यो आयोजनाबाट २१.९ प्रतिशत बिजुली निःस्शुल्क पाउने भनिएको छ । आयोजनाले हिउँदमा ७४४.७९ गिगावाट घण्टा र वर्खायाममा १७०३.८ गिगावाट घण्टा उत्पादन गर्न सक्ने अनुमान छ ।