कावा प्रधानमन्त्री खडकाले भने- ‘अर्थतन्त्र चलायमान बनाउन सरकार लागिरहेको छ’

११ असोज, काठमाडौं । कार्यवाहक प्रधानमन्त्री एवं रक्षामन्त्री पूर्णबहादुर खड्काले सरकार अर्थतन्त्र चलायमान बनाउन लागिरहेको बताएका छन् ।

बिहीबार सुर्खेतको गुर्भाकोट नगरपालिका–९ बाेटेचाैर पुगेर भेरी कोरिडोर सिँचाइ तथा नदी व्यवस्थापन आयोजना कार्यालय उद्‍घाटन गर्दै कावा प्रधानमन्त्री खडकाले आर्थिक गतिविधि बढाउन सरकारले विभिन्न कार्यक्रम गरिरहेको बताए ।

उद्घाटनपनि कार्यक्रमलाई सम्बोधन गर्दै खड्काले राष्ट्रिय गौरवको भेरी–बबई डाइभर्सन बहुउद्देश्यीय आयोजना प्रभावित क्षेत्रका जनताका लागि सिँचाइ, विद्युतीकरण, सडक पूर्वाधारलगायतको सुविधाका लागि भेरी किनारमा नयाँ कार्यालय स्थापना गरेको बताए । 

डोल्पा, जाजरकोट, रूकुम, सल्यान र सुर्खेतमा भेरी नदीसँग जोडिएका पालिकामा सडक, विद्युतीकरण, सिँचाइलगायत सामाजिक सेवाका कार्य गर्ने उद्देश्यले नयाँ कार्यालय स्थापना गरिएको उनको भनाइ थियो । उनले भेरी–बबई डाइभर्सनबाट प्रभावित स्थानीय पक्षमा सरकारले सधैं काम गर्ने समेत प्रतिवद्धता जनाए ।