फ्री भिषा र फ्री टिकटको सस्तो नारा दिएर मेनपावरलाई राज्य ठग्ने लाइसन्स दिइएको छः श्रममन्त्री भण्डारी

१२ असोज, महोत्तरी । श्रम तथा सामाजिक सुरक्षामन्त्री शरतसिंह भण्डारीले वैदेशिक रोजगारलाई अवसरको रुपमा लिनुपर्ने बताएका छन । सुरक्षित आप्रवासन कार्यक्रम (सामिले) ले आयोजना गरेको कार्यक्रममा सहभागी हुन महोत्तरी पुगेका मन्त्री भण्डारीले वैदेशिक रोजगारलाई नै व्यवस्थित बनाउनुको विकल्प नरहेको बताएका हुन ।

विदेश जानुपर्ने बाध्यात्मक अवस्थालाई अवसरको रुपमा प्रयोग गरे नेपालले सीप र अनुभवलाई भित्र्याएर समृद्ध बनाउन सकिने धारणा व्यक्त गरेका छन् । बैदेशिक रोजगारलाई व्यवस्थित बनाउन श्रम मन्त्रालयबाट ऐतिहासिक कामहरू गरेको बताउँदै मन्त्री भण्डारीले बिचौलियाहरुबाट मुक्त बनाउने देखि रोजगार गन्तव्य मुलुकसँग नयाँ सम्झौताको लागि समेत प्रक्रिया अगाडि बढाएको बताए । खाडी तथा अन्य मुलुकहरूमा जानेको संख्या मधेश प्रदेशका जिल्लाहरुबाट उच्च रहेको र यसलाई सुरक्षित बनाउन अर्को चुनौती रहेको मन्त्री भण्डारीको भनाई छ ।

कार्यक्रममा आप्रवासी हकहित संजाल मधेश प्रदेशले विभिन्न १७ वटा बुँदासहितको माग राखेर ज्ञापनपत्र समेत बुझाएको छ । ज्ञापनपत्रमा उल्लेख भएका सबै बुँदाहरुमा कामहरू भएको बताउँदै मन्त्री भण्डारीले निकट दिनमा नै त्यसले कार्यान्वयनको रुप लिनेमा आश्वस्त बनाए ।

ज्ञापनपत्रमा वीमा कम्पनीले मृतक परिवारलाई जवर्जस्ती पुनः बीमा गराउने, वैदेशिक रोजगार बोर्डबाट प्रदान गरिने उपचार खर्च छिटो, छरितो बनाउनु पर्ने, वैदेशिक रोजगारमा जानेहरूलाई अनिवार्य सीप, तालिमको व्यवस्था गरिनुपर्ने जस्ता माग राखिएको छ ।

मन्त्री भण्डारीले २०७२ मा घोषणा गरेको फ्री भिषा, फ्री टिकट सस्तो लोकप्रियताको लागि गरिएको बताउँदै त्यो व्यवहारतः नभएको जिकिर गरे । रोजगार गन्तव्य मुलुकहरू मध्ये केही कम्पनीमा यस्तो भएतापनि १० हजार लागतको नाममा मेनपावर व्यवसायीहरूले राज्यलाई नै ठगिरहेको जनाएका छन् ।

कागजमा १० हजार तर कामदारसँग लाखौं रुपैयाँ लिने अनि राज्यलाई कर नतिर्ने विषयमा हामी नयाँ ढंगले काम गरिरहेका छौ,झ मन्त्री भण्डारीले भने, अब बिचौलियाबाट मुक्त बनाउन मेनपावर व्यवसायी स्थानीय तहको रोजगार शाखामा जोडिने प्रक्रिया पनि अगाडि बढेको छ ।