पर्यटक स्वागत तथा सत्कारको पर्खाइमा महोत्तरीका व्यवसायी

♦ विशाल बस्नेत

११ असोज, महोत्तरी । विश्व पर्यटन दिवसको अवसरमा महोत्तरीका होटल तथा पर्यटन व्यवसायीहरूले आन्तरिक र बाह्य पर्यटकको लागी छुटसहितको स्वागतमा जुटेका छन् ।

होटल तथा पर्यटन व्यवसायी संघ महोत्तरीमा आबद्ध व्यापारीहरुले आन्तरिक र बाह्य पर्यटनको लागी २५ प्रतिशत छुटसहित स्वागतमा जुटेका हुन । पर्यटकहरूलाई आकर्षण गर्न जिल्लाका मुख्य सडकहरूमा झिलिमिली बत्ती जडान गरिएको छ भने मन्दिर तथा पर्यटकीय स्थलहरूमा सरसफाइ समेत गरिएको छ ।

यो पर्यटन दिवस ७ दिनसम्म मनाउने निर्णय गरिएको होटल तथा पर्यटन व्यवसायी संघ महोत्तरीका अध्यक्ष गोपाल कार्कीले जानकारी दिए । 'यो अवधिमा स्थानीय पर्यटकीय सम्भावनाको खोजी र योजना पनि बनाउने छौ,' अध्यक्ष कार्कीले भने , 'पहिलो दिन बुधबार हामीले जिल्लाको उत्तरवर्ती क्षेत्रका पहाडहरू घुम्यौ ।'

जिल्लाको उत्तरवर्ती क्षेत्रमा रहेका उच्च पहाडहरू राई मण्डल, चनौटे डाडोँजस्ता ठाउँहरुको सम्भाव्यता अध्ययन गरिएको अध्यक्ष कार्कीले बताए । होटल तथा पर्यटन व्यवसायीहरू जिल्लाका सीमा नाका र एयरपोर्टमा पुगेर खादा तथा माला लगाउँदै आन्तरिक र बाह्य पर्यटकको स्वागत गर्ने समेत कार्यक्रम रहेको छ ।

बुधबार मात्र ३ सय भन्दा बढी पर्यटकहरूलाई स्वागत, सत्कार गरिएको होटल तथा पर्यटन व्यवसायी संघ महोत्तरीले जनाएको छ । योसगैँ पर्यटन व्यवसायीहरू जिल्लाका सम्भावित पर्यटकीय स्थलको सम्भावनाको संघन खोजीमा जुटेका छन् । 

 

मधेश कै उच्च मानिएको राई मण्डल तथा चनौटे डाडामा केवुलकार तथा जिप लाइनको सम्भावनासहित थप सम्भाव्यता अध्ययन गरिनु पर्ने होटल तथा पर्यटन व्यवसायी संघ महोत्तरीको निष्कर्ष छ ।