जनकपुरधामको खाद्य तथा पोषण कार्यालयमा किसानहरूले गरे तालाबन्दी

१२ असोज, काठमाडौं । जनकपुरधामस्थि खाद्य तथा पोषण सुरक्षा सुधार आयोजनाको क्लस्टर ईकाइमा कार्यालय प्रमुखसहितको मिलेमतोमा व्यापक अनियमितता भएको भन्दै किसानहरुले कार्यालयमा तालाबन्दी गरेका छन् । उनीहरुले कार्यालय प्रमुख कुशेश्वर झा लगायत ५ जनाको सरुवाको माग गरेका छन् । 

शुक्रबार तालाबन्दी गर्दै कार्यालय प्रमुख झा, अधिकृत रितेश झा, कृषि टेक्निनिसियन विवेक आचार्य, पशु टेक्निसियन जागेश्वर महतो र पशु प्राविधिक वीरेन्द्र दासको सरुवाको माग गरेका छन् । खाद्य तथा पोषण सुधार आयोजना कलस्टर इकाई जनकपुरधामबाट धनुषाका दुई र महोत्तरीका २ गरी कुल ४ वटा पालिकामा कार्यक्रम सञ्चालन हुँदै आएको छ ।

अनियमितताबारे छानबिन गर्न जिल्ला प्रशासन कार्यालय महोत्तरीमा निवेदन दिँदा बेवास्ता भएपछि बाध्य भएर तालाबन्दी गर्नुपरेको उनीहरुको भनाइ छ । अनियमिततामा संलग्नको सरुवा गरी कारवाही नभएसम्म तालाबन्दी नखोल्ने उनीहरुको अडान छ ।