डाक्टरहरूका माग सम्बोधन गर्न संसदीय समितिको निर्देशन

१२ असोज, काठमाडौं । संसदीय समितिले आन्दोलनरत चिकित्सकहरूका माग वार्तामार्फत सम्बोधन गर्न स्वास्थ्य तथा जनसंख्या मन्त्रालयलाई निर्देशन दिएको छ । शुक्रबार शिक्षा, स्वास्थ्य तथा सूचना प्रविधि समितिको बैठकले स्वास्थ्य सेवालाई मर्यादित, सुरक्षित, भयरहित बनाएर निर्वाध रूपमा सेवा प्रवाह गर्ने वातावरण तयार गर्न स्वास्थ्य मन्त्रालयलाई निर्देशन दिएको हो ।

स्वास्थ्य सेवालाई मर्यादित, सुरक्षित, भयरहित बनाई निर्वाध रुपमा सेवा प्रवाह गर्ने वातावरण तयार गर्न स्वास्थ्य मन्त्रालयलाई निर्देशन दिने निर्णय भएको समिति सभापति भानुभक्त जोशीले जानकारी दिए । उनले बैठकपछि निर्णयहरू सार्वजनिक गरेका छन् ।

चिकित्सकमाथि भएको आक्रमण र दुर्व्यवहारका घटनाप्रति समितिले दुःख र खेद प्रकट गर्दै दोषी उपर नियमानुसार कारबाही गर्न समेत स्वास्थ्य तथा जनसंख्या मन्त्रालयलाई निर्देशन दिइएको छ । पोखराको मणिपाल अस्पताल र लमजुङका स्वास्थ्य चौकीमा कार्यरत चिकित्सकमाथि बिरामीको उपचारका विषयलाई लिएर सेवाग्रहीबाट आक्रमण भएपछि सुरक्षाको माग गर्दै चिकित्सकहरू काठमाडौंमा आन्दोलनमा उत्रिएका छन् ।

यसै बीच आजै मात्र गृहसचिव दिनेश भट्टराईले सरकारले सुरक्षाको व्यवस्था गर्ने आश्वसन दिँदै चिकित्सकहरूलाई आन्दोलनबाट फिर्ता हुन आग्रह गरेका छन् । स्वास्थ्य मन्त्री मोहनबहादुर बस्नेतले पनि आन्दोलन फिर्ता लिएर काममा खटिन आग्रह गरेका छन् । उनले अस्पतालमा स्वास्थ्यकर्मीको सुरक्षाका लाति हतियारसहित सुरक्षाकर्मी तैनाथ गरिने आश्वासन समेत दिएका छन् ।