सम्झौता र समझदारीले नेपाल र चीनबीचको सम्बन्ध विकासमा नयाँ उचाइ थपिएकाे छ : प्रधानमन्त्री प्रचण्ड

१२ असोज, काठमाडौं । प्रधानमन्त्री पुष्पकमल दाहाल  ‘प्रचण्ड’सँग छेन्तुका चिनियाँ कम्युनिष्ट पार्टी सिचुवान प्रान्तका सेक्रेटरीले शुक्रबार द्विपक्षीय भेटवार्ता गरेका छन् । 

सिचुवान प्रान्तीय जनकांग्रेसको स्थायी समितिका अध्यक्ष समेत रहेका वाङ सिन्हुई नेतृत्वको चिनियाँ प्रतिनिधिमण्डलले आज प्रधानमन्त्रीसँग विशेष भेटवार्ता गरेको हो ।

भेटवार्तामा प्रधानमन्त्री प्रचण्डले राष्ट्रपति सी, प्रधानमन्त्री लीसहितको उच्चस्तरीय भेटवार्ता र दुई देशको तर्फबाट जारी वक्तव्यको स्मरण गर्दै छुङकिङ, तिब्बत, सिचुवानको भ्रमणका क्रममा भएका भेटवार्ताले दुई देशबीच नयाँ र उच्चस्तरको सम्बन्ध विकासमा महत्वपूर्ण सहयोग पुग्ने बताए । आगामी दिनमा दुवै देशले सहमति र सम्झौता कार्यान्वयनमा जोड दिनुुपर्ने बताए । नेपालको तर्फबाट कार्यान्वयनमा कुनै किसिमका समस्या नहुने विश्वास समेत व्यक्त गरे । 

सो क्रममा सिचुवान प्रान्तका पार्टी सेक्रेटरी वाङले प्रचण्ड चीनको असल साथी भएको र प्रचण्ड नेतृत्वमा नेपाल–चीन सम्बन्ध नयाँ आधारमा विकास हुने विश्वास व्यक्त गरेका थिए । उनले नेपाल र चीनबीच भएको समझदारी कार्यान्वयन गर्न आफूहरु प्रतिवद्ध रहेको बताए ।

आठ दिने औपचारिक चीन भ्रमणमा रहेका प्रधानमन्त्री नेतृत्वको प्रतिनिधिमण्डल भोलि छेन्तुबाट नेपाल फर्किने कार्यक्रम तय भएको छ ।