काेशीकाे अधिवेशनमा ओलीले भने- एमालेविरुद्ध घेराबन्दी भइरहेको छ

१२ असोज, विराटनगर । प्रमुख प्रतिपक्षी दल नेकपा (एमाले)का अध्यक्ष केपी शर्मा ओलीले पार्टीविरुद्ध घेराबन्दी भइरहेको बताएका छन् । आज पार्टीको कोशी प्रदेश अधिवेशनको उदघाटन गर्दै उनले यस्तो बताएका हुन् । उनले अहिले पार्टीविरुद्धकाे घेराबन्दी ताेडेर राष्ट्रिय एकता कायम गराउन आवश्यक रहेको बताए । 

उनले सम्बोधन क्रममा कोशी प्रदेश नेतृत्व सर्वसम्मत चयन गर्न सके राम्रो हुने बताए । उनले कतिपय कुरा नेताको इसाराले टुंगो लगाउने बताउँदै इसारामा ध्यान दिनुपर्ने बताए । प्रदेश अध्यक्षमा विनोद ढकाल र घनश्याम खतिवडा मुख्यप्रतिस्पर्धी छन् ।

उनले विरोधीले अधिवेशनमा चुनाव भयो भने मिलाउन सकेनछन्, सहमति भयो भने नेताले पेलेर प्रतिस्पर्धा हुनै दिएनन् भन्ने आरोप लागेको बताए । विरोधीहरुको कुरा नसुनेर पार्टीको विधि र विधानबमोजिम अधिवेशन सम्पन्न गर्न निर्देशन दिए । 

उनले एक प्रसंगमा वर्तमान गठबन्धन सरकार अपराधीलाई संरक्षण दिने र जनताका समस्यालाई बेवास्ता गर्ने सरकार भएको आरोप लगाए । यसमा गठबन्धनका मुख्य दल नेपाली कांग्रेसले सोच्नुपर्ने बताए । उनले प्रधानमन्त्री प्रचण्ड संसद बैठक रोकेर लामो समय विदेश भ्रमणमा निस्कनु उचित नभएको टिप्प्णी गरे ।