विद्यालयको होस्टेलमा ८ वर्षीय बालक झुण्डिएर मृत फेला परेको घटनाले वीरेन्द्रनगरमा तनाव

१३ असोज, सुर्खेत । वीरेन्द्रनगरको एक निजी विद्यालयको होस्टेलमा ८ वर्षीय बालक मृत फेला परेका छन् । बालक मृत भेटिएपछि सुरु भएको आन्दोलन उग्र बन्दै गएको छ ।  वीरेन्द्रनगर  नगरपालिका–६ घण्टाघर नजिक रहेको उषा बाल वाटिका सेकेण्डरी स्कुलको होस्टेलमा ८ वर्षीय बालक मृत भेटिएका हुन् ।

मृत भेटिएका बालक चामुण्डा बिन्द्रासैनी नगरपालिका–२ दैलेखका सलाम पुलामी रहेको जिल्ला प्रहरी कार्यालय सुर्खेतले जनाएको छ । उषा बाल वाटिकामै कक्षा २ मा अध्ययनरत उनी शुक्रबार राति होस्टेलमा झुण्डिएको अवस्थामा फेला परेका हुन् । शुक्रबार राति झुण्डिएको अवस्थामा फेला परेका बालकको शव अहिलेसम्म उठाइएको छैन । घटना शंकास्पद भएको भन्दै आफन्तहरू आन्दोलन गरेका छन् ।

बालकको मृत्यु शंकास्पद रहेको भन्दै उनका आफन्तहरू आन्दोलन सुरु गरेका हुन् । आन्दोलन उग्र बन्दै गएपछि अहिले वीरेन्द्रनगरमा विद्युत अवरुद्ध हुनाका साथै  यातायातका साधनहरु सञ्चालनमा समस्या भइरहेको छ । आन्दोलनका कारण  वीरेन्द्रनगर बजार अशान्त छ । आफन्तहरूले घटना शंकास्पद रहेको भन्दै लास उठाउन दिएका छैनन् । 

प्रदेश प्रहरी कार्यालयका प्रवक्ता गोपाल चन्द्र भट्टराईले घटना शंकास्पद रहेको र अनुसन्धान गरिने बताएका छन् । आक्रोशित भीड घटनाको छानबिन गर्नुपर्ने भन्दै तोडफोडमा नै उत्रिएको छ । भीडलाई साम्य पार्न प्रहरीले अश्रु ग्याँस समेत प्रहार गरेको छ ।