रसुवामा तस्करीको १ किलो सुनसहित २ जना पक्राउ

१३ असोज, काठमाडौं । रसुवाको वेत्रावतीबाट तस्करीको १ किलो सुन बरामद गरिएको छ । केन्द्रीय अनुसन्धान ब्युरो (सीआईबी) को काठमाडौंबाट खटिएको टोलीले शनिबार बेलुकी सुनसहित २ जनालाई वेत्रावती पुलबाट पक्राउ गरेको हो ।

१ किलो सुनलाई चार टुक्रा बनाएर ल्याएको अवस्थामा उनीहरु पक्राउ परेका सीआईबीले जनाएको छ । पक्राउ पर्नेमा रसुवा गत्लाङका दावा साङ्बो तामाङ र आमा छोदिङ्मोका विशाल तामाङ छन् । उनीहरुले सुन मोटरसाइकलमा लुकाएर ल्याउँदै गरेको अवस्थामा बरामद भएको हो ।

यसअघि गत महिना रसुवाबाट २ किलो बरामद भएको थियो । केही दिनअघि दोलखाबाट पनि ७ किलो सुन बरामद भएको थियो । शुक्रबार त्रिभुवन विमानस्थलबाट पौने तीन किलो सुन बरामद भएको थियो ।