शिक्षा विधेयक र उच्चस्तरीय जाँचबुझ आयोगबारे छलफल गर्न प्रधानमन्त्रीले बोलाएको बैठकमा रास्वपा गएन

१४ असोज, काठमाडौं । विद्यालय शिक्षा विधेक र सुन तस्करी प्रकरणको छानविनका लागि गठन गर्ने भनिएको जाँचबुझ आयोग गठनबारे छलफल गर्न प्रधानमन्त्री पुष्पकमल दाहाल प्रचण्डले दलका नेताहरुलाई बोलाएका छन् । ११ बजे बालुवाटारमा बैठक बोलाइएको प्रधानमन्त्री प्रचण्डका प्रेस संयोजक सूर्यकिरण शर्माले जानकारी दिए ।

चीनबाट फर्किएलगत्तै प्रधानमन्त्री प्रचण्डले नेपाली कांग्रेस, नेकपा एमाले र माओवादी केन्द्रका नेताहरुले आइतबार बिहान बालुवाटारमा छलफल गरेका थिए । बैठकमा नेताहरु जम्मा भइरहेका छन् । प्रधानमन्त्री प्रचण्डले न्युयोर्क र चीन भ्रमणका साथै आज दिउँसो एक बजे बोलाइएको संसद बैठकबारे नेताहरुसँग छलफल थालेका छन् । 

त्यसका लागि प्रमुख प्रतिपक्षी दल नेकपा एमालेका अध्यक्ष केपी शर्मा ओली, उपाध्यक्ष विष्णु पौडेल, सचेतक महेश बर्तौला बालुवाटार पुगेका छन् । आजको प्रतिनिधिसभा बैठकमा विद्यालय शिक्षा विधेयक पेश गर्ने सम्भावित कार्यसूची छ । तर नेकपा एमालेले सुन तस्करी प्रकरणमा जाँचबुझ आयोग गठन नगरिएको भन्दै संसद सन्चालनमा सरकारलाई ‘असहयोग’ गर्ने चेतावनी दिएको छ ।

यसैबीच राष्ट्रिय स्वतन्त्र पार्टीका सभापति रवि लामिछानेले मूल्यवृद्धिको विरोधमा प्रधानमन्त्री पुष्पकमल दाहाल प्रचण्डले बेलाएको बैठक बहिष्कार गरेका छन् । चाड पर्वहरूको मुखमा आम उपभोक्ताहरूलाई मार पर्ने गरी सरकारले मूल्यवृद्धि गरेकोमा आपत्ति जनाउँदै प्रधानमन्त्रीले बोलाएको बैठक बहिस्कार गर्ने लामिछानेले जानकारी दिए ।
 
‘चाड पर्वहरूको मुखमा आम उपभोक्ताहरूलाई मार पर्ने गरी सरकारले गरेको मूल्यवृद्धि प्रति हाम्रो गम्भीर आपत्ति छ। यसको विरोध स्वरूप आज प्रधानमन्त्री ज्युले बोलाउनु भएको बैठक हामीले बहिस्कार गरेका छौ ।