बैतडीको कटौजपानी स्वास्थ्य चौकीमा आकस्मिक सेवा २४ सै घण्टा संचालनमा

१४ असोज, काठमाडौं । बैतडीको दोगडाकेदार गाउँपालिकाको वडा नम्बर ८ कटौजपानी स्वास्थ्य चौकीमा आकस्मिक सेवा सन्चालन गरिएको छ । कटौजपानी स्वास्थ्य चौकीमा आकस्मिक सेवाको आइतबार उद्घाटन गरिएको स्वास्थ्यकचौकीमा  कार्यरत अनमी रमिता जोशीले जानकारी दिए।

दोगडाकेदार गाउँपालिकाको वडा न. ८ का वडाध्यक्ष महेन्द्र बिष्ट , स्वास्थ्य चौकीका प्रमुख महेश सिंह बिष्ट वडा सचिव रामबहादुर बिष्टको उपस्थितिमा आकस्मिक सेवाको औपचारिक रुपमा उद्घाटन गरिएको अनमी जोशीले बताए । चौकीमा अब २४ सै घण्टा नागरिकहरुलाई सेवा दिने उनले बताए ।

आकस्मिक सेवा सञ्चालनमा आएपछि नागरिकहरुलाई सेवा लिन सहज हुने  स्वास्थ्य चौकी प्रमुख बिष्टको भनाई छ। आकस्मिक  सेवा र अरु सामान्य उपचार सेवा लिन अन्यत्र जानुपर्ने यहाँका नागरिकहरुको वाध्यता अब बिस्तारै हट्ने उनले बताए ।

कटौजपानी स्वास्थ्य चौकीमा अब चौबिसै घण्टा आकस्मिक स्वास्थ्य सेवा पाइने भएको छ । चौबिसै घण्टा आकस्मिक स्वास्थ्य सेवा दिने संस्थाको रुपमा घोषणा गरिएको छ ।

यसअघि दोगडाकेदार गाउँपालिकाको कार्यपालिका बैठकले पालिका भित्र रहेका स्वास्थ्य संस्थाहरूमा चौबिसै घण्टा हाल कार्यरत जनशक्तिले नै आकस्मिक सेवा उपलब्ध गराउने निर्णय गरेको थियो ।