अभिनेता अनमोल केसीलाई हाजिरी जमानीमा छाड्ने तयारी

१४ असोज, काठमाडौं । अभिनेता अनमोल केसीलाई हाजिरी जमानीमा छाड्ने तयारी भएकाे छ । उनलाई आइतबार राति नै छाड्ने तयारी भएको जिल्ला प्रहरीले जनाएकाे छ ।

जिल्ला अदालतले ३ दिन हिरासतमा राख्न अनुमति दिए पनि उनलाई अनुसन्धानका लागि हिरासतमा राख्नुपर्ने अवस्था नदेखिएकाले छाड्न लागेको बताइएकाे छ । प्रहरीका अनुसार कुनै अभियुक्तलाई हिरासतमा राख्नुपर्ने तीनवटा कारण हुन्छन् ।

एउटा, अर्को अपराध गर्न सक्छ, दोस्रो, अपराधको प्रमाण मेटाउन सक्छ र अर्को, फरार हुन सक्छ । अनमोलको हकमा तीनवटै सम्भावना नदेखिएकाले छाड्न लागिएको प्रहरीले जनाएकाे छ । उनलाई खोजेको बेला उपस्थित हुने गरी अभिभभावकको जिम्मा लगाउने तयारी छ ।

आपराधिक विश्वासघात गरेको आरोपमा शुक्रबार पक्राउ परेका केसीलाई आइतबार काठमाडौं जिल्ला अदालतमा पेस गरिएको थियो। 'रावायण' फिल्म खेल्न उनले १० लाख रूपैयाँ लिएको तर पछि नखेल्ने भनेर रकम पनि फिर्ता नगरेको आरोप उनीमाथि छ।

फिर्ता नगरेपछि निर्माताले काठमाडौं उपत्यका अपराध अनुसन्धान कार्यालयमा जाहेरी दिएका थिए। जाहेरी परेपछि प्रहरीले गत शुक्रबार केसीलाई पक्राउ गरेको हो। 

शुक्रबार पक्राउ परेका केसीको स्वास्थ्य अवस्था ठीक नभएको भन्दै महाराजगन्जस्थित चिरायु अस्पतालमा भर्ना गरिएको थियो। शनिबार सार्वजनिक बिदा भएकाले उनलाई आज अदालतमा उपस्थित गराइएको हो। तीन दिन म्याद पाएकाले केसीलाई सोमबार पुन: अदालतमा उपस्थित गराउनुपर्नेछ।