बेंसीशहरमा कुकुर पाल्न नगरपालिकाको अनुमति लिनुपर्ने

 
१५ असोज,  लमजुङ । लमजुङको सदरमुकाम समेत रहेको बेंसीशहर नगरपालिकाले कुकुर पाल्नका लागि नगरपालिकाबाट अनुमती लिन सर्वसाधरणलाई आग्रह गरेको छ । 

नगरपालिकाले एक सुचना जारी गर्दै निजी रुपले पालिका कुकुरहरूलाई नगरपालिकामा दर्ता गरी अनुमति लिन १५ दिने सार्वजनिक सुचना जारी गरेको हो । 

बेसीशहर नगरपालिकाको क्षेत्रभित्र अत्याधिक रुपमा वेवारिसे तथा घरपालुवा कुकुरहरूको संख्या बृद्धि भई फोहोर प्रदूषण र दुर्घटनासमेत बढेको भन्दै त्यसलाई व्यवस्थापन गर्न नगरपालिकाले सूचना जारी गरेको हो ।

विशेषगरी कुकुरहरूले बजार क्षेत्र अन्तर्गतका सडक छेउमा रहेका घर तथा होटलहरूमा पसी खानेकुरा खाईदिने तथा घरभित्रै पसेर दिसापिसाव गरी फोहर बनाउने र सडक पेटी तथा नालीहरूमा जथाभाबी रुपमा दिशापिसाव गरी फोहर भएको गुनासो आएसँगै त्यसलाइ व्यवस्थापन गर्न नगरपालिका लागि परेको सूचनामा उल्लेख गरिएको छ । 

नगरपालिकाले निजी रुपमा पालिएका कुकुरहरूलाई जथाभावी रुपमा नछाड्न र सडक पेटी, छेउ, भित्ता तथा नालीहरूमा अव्यवस्थित तवरबाट दिशा पिसाब गराउने कार्य बन्द तथा गराउन पनि सोही सूचनामार्फत आग्रह गरेको छ । 

नागरिकबाट गुनासो आए सँगै कुकुर व्यवस्थापनका निम्ति नगरपालिकाले १५ दिनको अवधि दिएर सार्वजनिक सुचना जारी गरेको हो । सो अवधी भित्र घरपालुवा कुकुर नगरपालिकामा दर्ता नगराएमा तथा अनुमति नलिएमा नियमानुसार जरिवाना तथा कारबाही प्रकृया अगाडि बढाईने नगरपालिकाले जनाएको छ ।