मन्त्री ज्वालासँग एमसीसी टोलीको भेट : ‘कार्यान्वयनमा कुनै शंका गर्नुपर्दैन’

१५ असोज, काठमाडौं । भौतिक पूर्वाधार तथा यातायात मन्त्री प्रकाश ज्वालाले एमसीसी परियोजना कार्यान्वयनमा शंका नगर्न आग्रह गरेका छन्। नेपाल भ्रमणमा रहेकी एमसीसी प्रमुख कार्यकारी अधिकृत एलिस अलब्राइट र नेपालका लागि अमेरिकी राजदूत डीन थम्पसनसँगको भेटमा मन्त्री ज्वालाले सार्वभौम संसद र सरकारले निर्णय गरेको परियोजना कार्यान्वयनमा जाने बताएका हुन्। 

‘नेपाल सरकार र सार्वभौम संसदले एमसीसी परियोजना पास गरिसकेको छ, परियोजनाको सफल कार्यान्वयनमा नेपाल सरकारले कुनै कमी गर्नेछैन,’ मन्त्री ज्वालाको भनाई उद्धृत गर्दै उनको सचिवालयले भनेको छ ।, ‘परियोजनामा केही समस्या छन् तर ठीक समयमा सुरु गरेर ठीक समयमा निर्माण सकेपछि अहिले उब्जिएका कतिपय समस्याहरू आफैं हल भएर जानेछन्।’ 

एमसीसी एक्जुकेटिभ डाइरेक्टर एलिस अलब्राइटले एमसीसी परियोजना कार्यान्वयन भए आफू र आफ्नो देश पनि खुशी हुने बताइन्। उनले भनिन् ‘एमसीसी परियोजना कार्यान्वयनको चरणमा म नेपाल आएकी छु, नेपाल सरकारको सकारात्मक धारणाले म खुशी पनि छु’