सामाजिक सदभाव कायम राख्न नेपालगञ्जमा कर्फ्यु

१६ असोज, काठमाडौं । जिल्ला प्रशासन कार्यालय बाँकेले सामाजिक र धार्मिक सदभाव विथोलिने सम्भावनालाई ध्यानमा राखेर नेपालगञ्जमा निषेधाज्ञा जारी गरेको छ । मंगलबार हिन्दु र मुस्लिम समुदायबीच झडप हुने संकेत देखिएपछि नेपालगञ्ज उपमहानगरपालिका क्षेत्रमा कर्फ्यु जारी गरिएको प्रशासनले जनाएको छ । 

हिन्दुहरुको समूह आज नेपालगञ्जमा भेला भएर प्रदर्शनमा उत्रिएको छ । त्यसमा झडप हुन सक्ने र सदभाव विग्रिने संकेत देखिएपछि कर्फ्यु जारी गरिएको हो । सम्भावित तनावलाई मध्यनजर गर्दै नेपालगञ्जमा आज बिहान सदभाव र्यालीसमेत निकालिएको थियो ।

जिल्ला प्रशासन कार्यालय बाँकेले सोमबार मात्र जरुरी सूचना जारी गरी धार्मिक आस्थामा आँच पुर्याउने, धार्मिक विद्वेष फैलाउने जस्ता गतिविधि नगर्न भनेको थियो । यदि त्यसो गरेमा स्थानीय प्रशासन ऐन २०२८ तथा प्रचलित कानुन बमोजिम कडा कारबाही गर्ने चेतावनी दिएको थियो ।