जातीय द्वन्द्व बढाउने सन्देश फैलाउनेहरूलाई साइबर अपराधमा मुद्दा चलाउन सांसद जबराको माग

१६ असोज, काठमाडौं । बाँकेको नेपालगन्जमा धार्मिक सद्भाव कायम गरिराख्न सांसद धवलशमशेर जबराले आग्रह गरेका छन् । नेपालगन्ज बजारमा दुई समुदायबीच झडप हुँदा कर्फ्यु लागेको जानकारी दिँदै राप्रपाका सांसद जबराले कानुन कार्यान्वयनमा पनि सरकारसँग आग्रह गरेका छन् । 

प्रतिनिधिसभाको मंगलबारको बैठकमा सांसद जबराले विशेष समय लिएर बोल्दै सामाजिक सञ्जालमार्फत दुई समुदायबीच सद्भाव भड्किने भ्रामक सन्देश प्रवाह गरिएको भन्दै त्यस्तो गर्नेहरूलाई कारबाही गर्न माग गरेका छन् । उनले यो सबैको जड भनेको मोबाइलको सञ्जाल भएको बताएका छन् । 

दुई समुदाय तथा जातीय द्वन्द्व बढाउने सन्देश फैलाउनेहरूलाई साइबर अपराधमा मुद्दा चलाउन सांसद जबराले माग गरेका छन् । ’यो साइबर अपराधको कानुनलाई तुरुन्तै कार्यान्वयनमा ल्याएर दोषीहरूलाई ठाउँका ठाउँ कारबाही गरिएन भने देशमा दंगा भड्किने सम्भावना बढिरहेको छ,’ उनले भने ।

शान्तिपूर्ण रूपमा सबैलाई विरोध तथा असन्तुष्टि जाहेर गर्न पाइने तर उग्र हिंसाको बाटो अंगाल्नु ठिक नभएको सांसद जबराको भनाइ थियो । ’नेपालगन्जका दुवै समुदायलाई आग्रह गर्न चाहन्छु नेपालगन्ज सद्भावको सहर हो । शान्तिपूर्ण रूपमा विरोध गर्न पाइन्छ तर उग्र हिंसाको बाटो लिएर हाम्रो सद्भावको सहरमा अशान्तिको भावना ल्याएर सद्भाव नखल्बल्याउन नेपालगन्जबासीलाई विनम्र अनुरोध गर्छु,’ उनले भने ।