सुन तस्करी प्रकरणको स्वतन्त्र र निष्पक्ष छानबिन गर्ने आँट गृहमन्त्रीमा देखिएनः अध्यक्ष ओली

१६ असोज, काठमाडौं । नेकपा एमालेका अध्यक्ष केपी शर्मा ओलीले सुन तस्करीको अनुसन्धानमा उपप्रधानमन्त्री तथा गृहमन्त्री नाराणयकाजी श्रेष्ठ आत्तिएको बताएका छन् । उनले सुशासनलगायतका विषयमा गृहमन्त्री श्रेष्ठको आलोचना गरेका छन् । सुन तस्करीमा संलग्नहरूलाई पक्राउ नगरेको भन्दै ओलीले गृहमन्त्री श्रेष्ठमाथि ओलीले प्रश्न उठाएका छन् । 

प्रतिनिधिसभाको मंगलबारको बैठकमा ओलीले उपप्रधान तथा गृहमन्त्री श्रेष्ठले हेटौंडामा दिएको अभिव्यक्तिलाई लिएर पनि आलोचना गरे । साढे ९ किलो सुन भेपमा पक्राउ पर्छ तपाईं ढाकछोप गर्न लाग्नुहुन्छ । १ सय किलो सुन बरामद हुन्छ छानबिन गर्दा के बिग्रिन्थ्यो ? महासय तपाईं किन आत्तिनुभयो स्वतन्त्र निष्पक्ष छानबिनसँग, ओलीले भने ?’

सुशासन अभियान नभएर सरकारको काम भएको ओलीको भनाइ थियो । सरकारले सुशासनको अभियान चलाएको भन्न नहुने पनि बताए । ’सुशासन सरकारले निरन्तर कायम गर्ने हो कि अभियान हो ? सुशासन भनेको सरकारको नियमित कर्तव्य हो,’ उनले भने, ’सुशासनको अभियान चलाएको त्यसलाई रोक्न विरोधी लाग्या छन् भनेर हेटौंडामा उधुम खोक्नुभयो ।’

सरकारले सुशासनको काम नियमित गर्नुपर्ने उनको भनाइ थियो । सरकारले सुरक्षा दिनुपर्ने र भ्रष्टाचार रोक्नुपर्ने बताए । उनले सरकारले जनतालाई सेवा दिनुपर्ने बताए । प्रतिपक्षमाथि सुशासनको अभियान रोक्न लागेको भनेर गृहमन्त्रीले गलत बोलेको ओलीको भनाइ थियो ।