धार्मिक र साम्प्रदायिक अतिवादले देशमा विद्वेष फैलाउने काम गर्दासमेत कांग्रेसले बोल्ने आँट गरेनः ओली

१७ असोज, विराटनगर । नेकपा एमालेका अध्यक्ष केपी शर्मा ओलीले गलत मनसायले देशमा विद्वेष फैलाउने कार्य भइरहँदा समेत नेपाली कांग्रेसले बोल्ने आँट नगरेको बताएइका छन् । एमाले कोसी प्रदेश कमिटीका नव निर्वाचित कार्यसमितिका पदाधिकारीको पदस्थापन समारोहमा भाग लिन विराटनगर पुगेका ओलीले विमानस्थलमा कांग्रेसबारे  टिप्पणी गर्दै यस्तो बताएका हुन् । 

ओलीले धार्मिक, साम्प्रदायिक अतिवाद र विद्वेष फैलाउने काम नराम्रो भएको भनेर कांग्रेस नबोलेको बताए । सरकार यो विषयमा संवेदनशील हुनुपर्ने ओलीको भनाइ छ । गलत अभीष्ट पूरा गराउन मान्छेहरू खेल्न खोजिरहेको भन्दै उनले नेपाली जनता यस्तो कुरामा नलाग्ने बताए । उनले यस्ता घटनाले भएको क्षति नेपाली जनता धेरै पटक भोगिसकेकाले द्वन्द्व बढाउने काममा नलाग्ने बताए । 

देशमा यस्तो विकराल परिस्थिति उत्पन्न हुन लाग्दा पनि कांग्रेसको हविगत बोल्नै नसक्ने अवस्थामा पुगेको ओलीले बताए । कांग्रेस विचरा भएको छ, अहिले मानिसहरुले कांग्रेस कहाँ छ भनेर प्रश्न गर्न थालेका छन्, ओलीले भने । देशमा भ्रष्टाचार बढ्दासमेत कांग्रेस बोलेको छैन । देशका समसामयिक समस्याबारे कांग्रेसका नेताहरूसमेत नबोलेको देख्दा आफूलाई उदेक लागेको ओलीले सुनाए । 

अध्यक्ष ओलीले कोशी प्रदेशमा दलहरूलाई मध्यावधि चुनावतर्फ नजान आग्रह गरेका छन् । ’अहिले मध्यावधि चुनावमा जानु उचित हुँदैन,’ उनले भने, ’संविधानको धारा १६८ को (३) मा समर्थन दिनुभएन भने उक्त धाराको उपधारा (५) को अनिश्चिततातिर जान्छ र त्यहाँ एउटा खुड्किला मात्रै रहन्छ त्यहाँबाट चिप्लियो भने मध्यावधि चुनावको विकल्प रहँदैन ।’ एमाले जुनसुकै बेला जस्तोसुकै चुनावबाट भाग्ने र नहच्किने ओलीको भनाइ थियो । अहिले एमालेसँग भएको ४० सिटलाई कमसेकम १५ सिट बढाउनु छ त्यसैले मध्यावधि चुनावमा गएपनि एमालेलाई चिन्ता नभएको उनले स्पष्ट पारे । 

बहु जातीय, बहु धार्मिक, बहुभाषिक, बहु सांस्कृतिक देशको राष्ट्रिय सम्पदा भएकोले संरक्षण गर्नुपर्ने भएकाले विद्वेष फैलाउने र देशलाई द्वन्द्वतर्फ लग्ने कार्य किमार्थ सह्य नहुने अध्यक्ष ओलीको भनाइ थियो । देशलाई हिन्दु राष्ट्र घोषणाका लागि धार्मिक द्वन्द्व बढाउने कार्य भइरहेको हो ? भन्ने सञ्चारकर्मीको प्रश्नमा उनले ’संसदको दुई तिहाईले गर्ने काम विद्वेष र द्वन्द्व फैलाएर हुन्छ ?’ भन्दै प्रति प्रश्न गरेका थिए । उनले विद्वेष र द्वन्द्वबाट निष्कर्षमा पुगेको कुनैपनि कुरोको परिणाम असल नहुने बताएका छन् ।

ओलीले प्रधानमन्त्री पुष्पकमल दाहाल प्रचण्डको पछिल्ला समयमा भएका भ्रमणहरु अर्थहीन भएको भन्दै मानसरोवरको यात्रा पाप पखाल्नका लागि गरिएको आरोप लगाए । उनले भने, मानसरोवरसम्मको धार्मिक यात्रा पाप पखाल्नको लागि मात्र भएको हो । कसले कति र कत्रो पाप गरेको छ, घरमा पूजा पनि सोही अनुरुप लगाए जस्तै हो प्रधानमन्त्रीको भ्रमण ।

प्रधानमन्त्रीले भारत र चीन भ्रमण गरे पनि त्यसको कुनै सार्थक र ठोस परिणाम नआएको ओलीले बताए । अहिले देशभर साम्प्रदायिक र धार्मिक द्वेष फैलाउने कुचेष्ठा भइरहेको भन्दै ओलीले यो कसैका लागि पनि हितकर नहुने सुनाए । कोसी प्रदेशको राजनीतिक गतिरोध अन्त्य गर्नको लागि दलहरू मिलेर अघि बढ्नुको विकल्प नभएको उनले बताए । मध्यावधि निर्वाचन भए एमालेले थप सिट बढाउने दाबी गर्दै उनले भने, आज ४० सिट छ । मध्यावधि भयो भने थप १५ सिट बढ्छ ।