निर्माण व्यवसायीको बक्यौता ७० अर्बसम्म तिरि सकियो, बाँकी ७ अर्ब दशैंअघि नै भुक्तानी हुन्छः अर्थमन्त्री महत

१९ असोज, काठमाडौं । अर्थमन्त्री डा. प्रकाशशरण महतले निर्माण व्यवसायीको अघिल्लो आर्थिक वर्षको भुक्तानी गर्न बाँकी रकम दशैँअघि नै सरकारले भुक्तानी दिने बताएका छन् । उनले निर्माण व्यवसायीलाई करिव ७०  अर्ब रकम भुक्तान गरि सकिएकाले बाँकी रकम दशैँ अगाडि नै भुक्तानी गर्ने बताएका छन् । महतले सम्बन्धित मन्त्रालयलाई भुक्तानीको दायित्व माग गरिएको र त्यो आइ सकेपछि दशैं अगाडि नै भुक्तानी हुने दाबी गरेका छन् ।  

शुक्रबार चितवनमा पत्रकारसँग कुराकानी गर्दै उनले असार मसान्तसम्ममा ६० देखि ७० अर्ब भुक्तानी भइसकेको र अब ६ देखि सात अर्ब जति बाँकी होला, त्यो सबै मन्त्रालयबाट विवरण आएपछि भुक्तानी हुने बताए । अर्थमन्त्री डा. महतले देशमा बाहिर आएजस्तो चरम आर्थिक संकट नभएको बताउँदै केही हदसम्म समस्या भए पनि बाहिर देखिएजस्तो आर्थिक संकट नभएको दाबी गरे । 

महतले राष्ट्र बैंकले ऋण प्रवाहको सही सदुपयोग नहुँदा समस्या आएको बताए । उनले सहज रूपमा ऋण पाउँदा त्यसलाई उत्पादनशील क्षेत्रमा कहाँ परिणाम आउँछ, कहाँ आउँदैन नहेरी लगानी भएको र  त्यसको असर अर्थतन्त्रमा देखिएको बताए । अहिले मौद्रिक नीति खुकुलो नभएकाले ब्याजदर पनि बढ्यो र उत्पादन पनि नभएको भन्दै जसका कारण केही व्यवसायीलाई समस्या परेको अर्थमन्त्रीको भनाइ छ ।