कोशीका मुख्यमन्त्री हिक्मत कार्कीले दिए राजीनामा

२० असोज, काठमाडौं । कोशी प्रदेशका मुख्यमन्त्री हिक्मत कार्कीले राजीनामा दिएका छन् । नेकपा एमाले संसदीय दलका नेता समेत रहेका मुख्यमन्त्री कार्कीले शनिबार प्रदेशसभा बैठकलाई सम्बोधन गर्दै राजीनामा दिने घोषणा गरेका हुन् । ३० दिनभित्र विश्वासको मत पाउनुअघि नै उनले राजनीतिक निकासका निम्ति राजीनामा दिने घोषणा गरेका हुन्।

कार्कीले राजीनामा घोषणा गरेसँगै एमाले प्रदेश सरकारको नेतृत्वबाट बाहिरिएको छ। शनिबारको प्रदेशसभा बैठकमा मुख्यमन्त्री कार्कीले विश्वासको मत लिने कार्यसूची तय थियो। विपक्षमा बहुमत सांसदले मतदान गर्ने निश्चित भएसँगै कार्कीले राजीनामा घोषणा गरेका हुन्।

उनले जनताको माग मध्यावधि नभएको भन्दै राजनीतिक निकासका लागि सबै दललाई आह्वान गरे। 'प्रदेश निर्वाचन अहिले जनताका माग होइन। कतिपय घटनाले पनि जनतामाझ निर्वाचनको माहोल छैन। के कस्तो गरेर गर्न सकिन्छ, त्यसको लागि एमाले तयार छ। अरु दल पनि आउनपर्‍यो। यहाँ सरकारको कुरा रहेन अब,' उनले भने।

उनले सबै दललाई राजनीतिक निकासतर्फ नसोच्ने हो भने मध्यावधिलाई नकार्न नसकिनेसमेत बताए। 'हामी सच्चिएर नजाने हो भने हाम्रा अगाडि देखिएको मध्यावधिलाई नकार्न सकिँदैन। मध्यावधिमा जान एमाले डराउँदैन पनि,' उनले भने।

उनले एमाले सहमति सहकार्यका लागि हरदम तयार रहेको बताए। 'कतिपय साथीले एमालेले सहमति चाहेको छैन भन्ने पनि आयो। तर सहमतिका लागि एमालेले सबै विकल्प खुला छोडेको छ। सबैसँग सहमतिको प्रयास गरेको छ। मैले आधिकारिक पत्र पनि पठाएको छु,' उनले भने।

नेकपा एमाले संसदीय दलका नेता कार्की सर्वोच्च अदालतको आदेशअनुसार संविधानको धारा १६८ '३' अनुसार २२ भदौमा मुख्यमन्त्री नियुक्त भएका थिए । उनले संविधानअनुसार ३० दिनभित्र विश्वासको मत लिनुपर्ने थियो । विश्वासको मत दिन शनिबारको प्रदेशसभा बैठक राखिएको थियो ।

तर प्रदेशसभा बैठकअघि बसेको एमाले संसदीय दलको बैठकले राजीनामा दिने निर्णय गर्‍यो । अहिले विश्वासको मत नपाए संविधानको धारा १६८ '५' अनुसार मुख्यमन्त्रीमा दाबी गर्न नपाउने भएपछि उनी राजीनामा दिने निर्णयमा पुगेका हुन् । उनकाे याे राजीनामासँगै अब संविाधानको धारा १६८ '५' अनुसार प्रदेश सभाका कुनै सदस्यको नेतृत्वमा सरकार गठनको बाटो खुलेको छ ।

कोशी प्रदेशसभामा नेपाली कांग्रेसका २९, नेकपा 'एमाले' का उपसभामुखसहित ४०, नेकपा 'माओवादी केन्द्र' का १३, नेकपा 'एकीकृत समाजवादी' का चार, जसपा एक र राप्रपाका ६ प्रदेशसभा सदस्य छन् ।