क्यानडाको आवासीय राजदूतावास नेपालमा खोल्न ग्रेटर नेपालको आग्रह

२१ असोज, काठमाडौं । ग्रेटर नेपाल राष्ट्रवादी मोर्चाले नेपालीले क्यानडाको भिसा लिनका लागि नेपालमा क्यानडाको आवासीय राजदूतावास खोल्न माग गरेको छ । आइतबार नेपाल राष्ट्रवादी मोर्चाका अध्यक्ष अध्यक्ष फणीन्द्र नेपालले क्यानडाका प्रधानमन्त्री जस्टिन ट्रुडोलाई एक पत्र पठाउदै क्यानडाको आवासीय राजदूतावास अविलम्ब नेपालमा खोल्न आग्रह गरेका हुन् ।  
 
१९६५ जनवरी १८ मा  नेपाल र क्यानडाबीच दौत्य सम्बन्ध स्थापना भएयता यी दुई देशबीच घनिष्ठ सम्बन्ध रहँदै आएको छ । २००९ अक्टोबर १ मा नेपालले क्यानडाको ओट्टावामा आवासीय राजदूतावास स्थापना गरेपछि यो सम्बन्ध थप प्रगाढ भएको सोही पत्रका उल्लेख छ । क्यानडाको आवासीय राजदूतावास काठमाडौंमा खाेले सम्बन्ध अझ कसिलो र बलियो बन्ने निश्चित छ । 
 
नेपालीलाई क्यानडाको भिसा लिन इन्डियाको दिल्ली जानुपर्ने बाध्यता हरेक दृष्टिकोणबाट पीडादायक देखिएको पत्रले उल्लेख गरेको छ । आर्थिक भार , भौगोलिक दूरी र व्यक्तिगत सुरक्षाका कोणबाट हेर्दा भिसा लिन दिल्ली पुग्नु धेरै झन्झटिलो, असुरक्षित र खर्चिलो छ । क्यानडाको आवासीय राजदूतावास काठमाडौंमा स्थापना गरिएमा कूटनीतिक हिसाबले मात्रै होइन, मानवीय दृष्टिले पनि निकै उपयोगी मोर्चाले पत्र मार्फत जनाएको छ । 

मोर्चाद्धारा लेखिएको पत्रमा भनिएको छ, सार्वभौमसत्तासम्पन्न दुई मुलुक नेपाल र क्यानडाबीचको सम्बन्धलाई व्यावहारिक रूपमा पनि नयाँ उचाइमा पु¥याउनेछ र नेपालबाट क्यानडा जानचाहने मानिसहरूका साथै नेपालबाट घर फर्किने क्यानडाली नागरिकहरूसमेत धेरै लाभान्वित हुने छन् । मोर्चाका अध्यक्ष नेपालले पत्रमार्फत प्रधानमन्त्रीसमक्ष नेपालमा क्यानडाको आवासीय राजदूतावास खोल्ने व्यवस्था अविलम्ब गरिदिन अनुरोध गरेका छन् ।