कोशी कांग्रेसमा विवाद: थापालाई पन्छाएर मुख्यमन्त्री बन्न शीर्ष नेतादेखि दल मिलाउने कसरतमा कार्की

२१, असोज, विराटनगर । प्रदेश प्रमुखबाट नयाँ सरकार गठनको आह्वान भएपछि कोशी प्रदेशको मुख्यमन्त्रीलाई लिएर नेपाली कांग्रेसभित्र चर्को विवाद सुरु भएको छ । मुख्यमन्त्रीबाट हिक्मत कार्कीले पदबाट राजीनामा दिएसँगै नेपाली कांग्रेस कोशी प्रदेश संसदीय दल भित्र विवाद सुरु भएको हो ।  

कांग्रेस कोशी प्रदेशसभाको संसदीय दलका नेता उद्धव थापालाई राजीनामा दिन वा मार्ग प्रशस्त गर्न पूर्वमन्त्रीसमेत रहेका प्रदेशसभा सदस्य केदार कार्की सक्रिय देखिएका छन् । उनी दुई हप्ता अगाडिदेखि मुख्यमन्त्रीका लागि लविङ गरिरहेका छन् । कोशी सरकारको नेतृत्व लिन कार्कीले कांग्रेसभित्रबाटै थापाविरुद्ध व्यापक दवाव सिर्जना गरिरहेका छन् । शीर्ष नेतासँग पनि कार्कीले चलखेल बढाएका छन् । 

मुख्यमन्त्री बन्ने कसरतमा लागेका नेता कार्की डा. शेखर कोइराला पक्षका हुन् । कृष्ण सिटौला समूहका थापालाई यसपटक पार्टी सभापति शेरबहादुर देउवाले पनि साथ नदिएको बुझिएको छ । कांग्रेसले कार्कीलाई मुख्यमन्त्री बनाउने भए अन्य दलहरूको पनि समर्थन रहने देखिएको छ । कार्की मुख्यमन्त्रीका उम्मेदवार भएर आए राप्रपाले पनि पनि साथ दिने बुझिएको छ । 

संविधानको धारा १६८ को उपधारा (२) अनुसार सरकार गठन प्रक्रियामा थापाले अपनाएको तरिका र विधिलाई अदालतले खारेज गरेको र त्यसले कांग्रेस तथा गठबन्धनकै बदनाम भएको भन्दै कार्कीले पार्टीमा आफूले संसदीय दलको नेता पाउनुपर्ने र मुख्यमन्त्री बन्न पालो पनि पार्टीबाट आफ्नै भएको बताउन थालेका छन् । उनले दुई हप्ता अगाडि एउटा समुहलाई कोशी ब्यारेजको भ्रमण गराएर आफू मुख्यमन्त्रीका लागि लागिरहेको बताएका थिए । 

पछिल्लो राजनीति घटनाक्रमसँगै कांग्रेसभित्र अदालतले दुई पटकसम्म मुख्यमन्त्री थापाको कदमलाई खारेज गरि दिएपछि गठबन्धनमा आबद्ध माओवादी, नेकपा एकीकृत समाजवादी र जनता समाजवादी पार्टीले समेत थापाको आलोचना गर्न थालेको छन् । कार्कीले कोइरालामार्फत उच्च तहमा दवाव बढाएका छन् । दुई पटकसम्म थापाले कुनै राजनीतिक वातावरण नबनाएकामा सभापति देउवा पनि असन्तुष्ट छन् । 

सिटौलाले पनि थापाका विषयमा देउवासमक्ष खास दवाव दोहोर्याउन नचाहेको देखिन्छ । सुझबुझपूर्ण ढंगले नेतृत्व नगरेकै कारण कोशी प्रदेश बजेट विहीन भएको र गठबन्धन घटकहरु समेत असफल भएको सन्देश गएको आरोप थापामाथि छ । कार्कीले शीर्ष नेताहरूको साथ पाउने सम्भावना पनि बढेर गएको छ । कार्कीले गठबन्धन दलभित्र वा गठबन्धन बाहिर सौहार्दपूर्ण सम्झौता गरेर संविधानको धारा १६८ को उपधारा ५ अनुसारको सरकार दिनुपर्ने बेलामा अव कांग्रेसले मुख्यमन्त्रीमा प्रस्ताव गर्ने व्यक्तिको चाल, चेहरा र चरित्रलाई हेरेर मात्रै अगाडि बढ्नुपर्ने बताउँदै आएका छन् ।