इजरायलको द्वन्द्वमा नेपालीको ज्यान गएको घटनाप्रति पूर्व राजाद्वारा दुःख व्यक्त

२२ असोज, काठमाडौं । पूर्वराजा ज्ञानेन्द्र शाहले हालै इजराइलमा भड्किएको हिंसामा ज्यान गुमाएका  १० जना नेपालीको मृत्युप्रति दुःख व्यक्त गरेका छन् । सोमबार एक विज्ञप्ति जारी गर्दै उनले अध्ययन र रोजगारीका शिलशिलामा इजरायलमा रहेका हजारौं नेपालीहरू युद्धको चपेटाबाट संकटापन्न अवस्थामा रहेकोमा पनि चिन्ता व्यक्त गरेका हुन् । 

‘यस्तो वियोग, वेदना र संकटको अवस्थामा उद्धार, उपचार गर्न र सबै नेपालीहरूलाई स्वदेश फर्काउनको लागि नेपालले तत्काल पहल गर्नु पर्ने तथा शान्त कूटनीतिक क्षमता दर्शाइ हाल्नु पर्ने आवश्यकता रहेको हामीले महसुस गरेका छौं ।’ पूर्व राजाको सम्वाद सचिवालयको विज्ञप्तिमा जारी छ । 

विज्ञप्तिमा आजको दुनियाँमा द्धन्द र युद्धले राम्रो गर्दैन भन्ने मान्यता राख्दै आपसी सम्बन्ध सुधारका लागि सबै पक्षबाट सकारात्मक प्रयास हुनुपर्ने धारणा पनि व्यक्त गरिएको छ ।