दशैंमा उपत्यकाको सुरक्षा व्यवस्था कडा पारिने, ड्रोनबाटसमेत निगरानीको तयारी

२२ असोज, काठमाडौं । नेपाली प्रहरीले काठमाडौं उपत्यकामा दशैंलक्षित विशेष सुरक्षा योजना बनाएर सुरक्षा व्यवस्थालाई कडा बनाउने भएको छ । जिल्ला प्रहरी परिसर काठमाडौंका प्रमुख भूपेन्द्रबहादुर खत्रीले उपत्यकाका विभिन्न भिडभाड हुने स्थानमा पर्याप्त जनशक्तिको व्यवस्था गरी उच्च प्रविधिमार्फत सीसीटीभी,ड्रोन र गोप्रोबाट सुरक्षा  निगरानी बढाउने बताएका हुन् ।

 चाडपर्वमा हुने विभिन्न आपराधिक घटनालाई मध्यनजर गरी  प्रविधिको सहायतामा नागरिकलाई सुरक्षित हिसाबले चाडपर्व मनाउन र सुरक्षा प्रदान गर्न आवश्यक जनशक्ति थप गरी पहिलो पटक प्रविधिमैत्री सुरक्षा दिन प्रहरीले तयारी गरेको उनको भनाई छ । 

उनले भने, ‘यात्रुहरूको सुरक्षा सन्दर्भमा उपत्यका प्रहरी कार्यालयले विशेष सुरक्षा योजना बनाएको छ । भिडभाड बढी हुने स्थानहरुमा सीसीटिभी र ड्रोन लगायत उच्च प्रविधिको पहिलो पटक प्रयोग गरी उपत्यकामा सुरक्षा निगरानी गर्ने क्रममा छौ । ड्रोनबाट भीडभाड हुने स्थानलाई नियालेर जनशक्ति सञ्चालन गर्नेछौं ।’

काठमाडौं जिल्लाका लागि मात्रै विशेष सुरक्षा योजना अन्तर्गत १४ स्थानमा नागरिक सहायता कक्ष स्थापना गरेको खत्रीले जानकारी दिए । उनले उपत्यकाको बसपार्क वरपर निगरानी गर्न आज मात्रै ३५ जना जनशक्ति खटाएको र बाँकी ५० को संख्यामा पनि थप गर्ने तयारी रहेको बताए ।  सोमबार बिहान ६ बजेदेखि अग्रिम टिकट बुकिङ सुरू भइसकेको छ ।