एमाले सुदूरपश्चिमको नेतृत्वका लागि ४ जनाको उम्मेदवारी दर्ता, साँझ ५ बजेदेखि मतदान सुरू गर्ने

२३ असोज, कैलाली । नेकपा एमाले सुदूरपश्चिम प्रदेशको अध्यक्षमा चार जनाको उम्मेदवारी परेको छ । आज बिहान ७ बजेदेखि साढे ११ बजेसम्म चार जनाले उम्मेदवारी दर्ता गराएको प्रमुख निर्वाचन अधिकृत पदम पालले जानकारी दिए । 

पालका अनुसार प्रदेश अध्यक्षमा निवर्तमान प्रदेश कमिटी उपाध्यक्ष कमल तिमिल्सिना, पूर्व जिविस सभापति कृष्णप्रसाद जैसी, भरतबहादुर साउद र बचनबहादुर सिंहले उम्मेदवारी दर्ता गराएका छन् । एमाले सुदूर पश्चिम प्रदेशको नेतृत्व चयन गर्न आज (मंगलबार) साँझ पाँच बजेदेखि निर्वाचन हुँदै छ । गएको आइतबारदेखि धनगढीमा एमाले सुदूरपश्चिम प्रदेशको अधिवेशन चलिरहेको छ । 

उम्मेदवारी फिर्ता गर्न निर्वाचन समितिले साढे १२ बजेदेखि २ बजेसम्मको समय दिएको छ । त्यसपछि उम्मेदवारको अन्तिम नामावली प्रकाशन गर्ने र साँझ ५ बजेदेखि मतदान सुरू गर्ने निर्वाचन समितिको तयारी छ । अध्यक्षमा चार जनाको उम्मेदवारी दर्ता भएपनि नेतृत्वका आकांक्षीबीच सहमति खोज्ने प्रयास भने जारी रहेको छ ।