९ केजी सुन तस्करी प्रकरणमा महरालाई उन्मुक्ति, छोरा राहुलसहित ४ जनाविरुद्ध संगठित अपराधमा मुद्दा दायर

२४ असोज, काठमाडौं । जिल्ला सरकारी वकिलको कार्यालय काठमाडौंले पूर्व सभामुख कृष्णबहादुर महरालाई उन्मुक्ति दिँदै उनका छोरा राहुल महरासहित ४ जनाविरुद्ध संगठित अपराध र भन्सार छलीको अभियोगमा अदालतमा मुद्दा दायर गरेको छ । बुधबार राहुलसहित चिनियाँ तस्करका सहयोगी लोकेन्द्र पौडेल, हाल ६१ केजी सुन तस्करी प्रकरणमै थुनामा रहेका दावा छिरिङ र काभ्रेका निमा गुरुङविरुद्ध मुद्दा दायर गरिएको हो । 

विद्युतीय चुरोट (भेप) मा लुकाए ल्याएको करिब ९ केजी सुन तस्करीको अभियोगमा प्रहरीको केन्द्रीय अनुसन्धान ब्युरो (सीआईबी) ले अनुसन्धान गरी रायसहितको प्रतिवेदन शुक्रबार सरकारी वकिलको कार्यालयमा पेस गरेको थियो । सीआईबीको रायअनुसार सरकारी वकिलको कार्यालयले आज मुद्दा दायर गरेको हो । दुबईबाट २०७९ पुस १० गते चिनियाँ तस्करले भेपमा लुकाएर ल्याएइको सुन विमानस्थल भन्सार कार्यालयले नियन्त्रणमा लिएको थियो । 

शंकास्पद रुपमा भेप ल्याएको पाइएपछि नियन्त्रणमा लिएर सामान गोदाममा सिल गरेर राखिएको थियो । तर त्यही सिल गरेकै अवस्थामा भेप चोरी भएको थियो । त्यसको अनुसन्धान गर्ने क्रममा भेपमा सुन आएको पाइएको थियो । भन्सारले भेप नियन्त्रणमा लिएपछि पूर्व सभामुख महरा र उनका छोरा राहुलले पटक पटक भन्सारका कर्मचारीलाई फोन गरी छुटाउन दबाब दिएका थिए ।

सीआईबीले गरेको सोधपुछमा समेत महराले त्यो कुरा स्विकारेका छन् । तर मुद्दा दायरमा भने उनलाई उन्मुक्ति दिएर उनका छोरा र अरु ३ जनालाई प्रतिवादी बनाएको छ । सुन ल्याउने मध्येका दावाजिन वाङसहित ६ चिनियाँ तस्कर फरार छन् । उनीहरूलाई पक्राउ परेका बखत कारबाही हुने गरी खोजी सूचीमा राखिएको छ ।