दूतावासले विवरण संकलन भइसक्यो भनेपछि इजरायलमा रहेका नेपाली लिन आज राति निगमको जहाज पठाइँदै

२४ असोज, काठमाडौं । सरकारले द्वन्द्वग्रस्त इजरायलमा अलपत्र रहेका नेपालीको उद्धारका लागि नेपाल वायु सेवा निगमको जहाज पठाउने भएको छ । इजरायलमा सम्पर्कमा आए जति नेपालीको विवरण संकलन गर्ने र सुरक्षित स्थानमा राख्ने काम सकिएको भन्दै दूतावासले खबर पठाएपछि दुबई हुँदै इजरायलमा जहाज पठाउन लागिएको हो ।

निगमको वाइड बडी जहाज–३३० आज राति २ः३० बजे इजरायल उड्ने तय भएको निगमका प्रवक्ता रमेश पौडेलले नेपालबहसलाई जानकारी दिए ।  परराष्ट्रमन्त्री एनपी साउद र पर्यटनमन्त्री सुदन किरातीबीच छलफल भएर आज राती नेपाल वायु सेवा निगमको जहाज पठाउन लागिएको हो । त्रिभुवन विमानस्थलबाट दुबई ट्रान्जिट बनाएर इजरायल जाने बताइएको छ । 

जहाज पठाउन विषयमा प्रधानमन्त्री पुष्पकमल दाहाल प्रचण्डलाई पर्यटनमन्त्री किरातीले सबै तयारी सकिएको र इजरायलमा रहेका नेपालीको उद्धारका लागि तत्काल जहाज तयारी अवस्थामा रहेको जानकारी दिएको प्रधानमन्त्रीको सचिवालयले जानकारी दिएको छ । बिहान प्रधानमन्त्री प्रचण्डले आज जहाज पठाउन तयारी अवस्थामा राख्न निर्देशन दिएका थिए ।  
 
उता, प्यालेस्टाइनी हमास समूहको आक्रमणपछि तनाव ग्रस्त बनेको इजरायलमा रहेका नेपाली विद्यार्थीले आफूहरूलाई सरकारले समयमै नेपाल फर्काउन पहल नगरेको भन्दै आक्रोश व्यक्त गरिरहेका छन् । इजरायलमा रहेको नेपाली राजदूतावासले पनि संकटग्रस्त क्षेत्रमा रहेका नेपाली नागरिकको विवरण संकलन कार्य लगभग सकिएको जनाएको छ । नेपालबाट हवाई जहाज पुग्नेबित्तिकै फिर्ताको काम सुरु हुने दूतावासको भनाइ छ । 

दूतावासले नेपाल फर्किन चाहनेहरूको विवरण पनि अनलाइनमार्फत संकलन गर्ने काम जारी नै राखेको छ । अब हवाईजहाज पुगेपछि नेपाल फर्किन चाहनेलाई फिर्ता पठाउने काम सुरु हुनेछ । सुरुका दिनमा अनलाइन विवरण भरेर नेपाल फर्किन चाहेका कतिपयले इजरायलकै अन्य स्थानमा बस्न चाहेको देखिएको र अब के गर्ने भन्ने उनीहरूको निर्णयमा भर पर्ने दूतावासले जनाएको छ ।