नेपाललाई जानकारी नदिइ उत्तराखण्डका मुख्यमन्त्रीसहित भारतीय प्रधानमन्त्री मोदी कालापानी क्षेत्रको भ्रमणमा

२५ असोज, काठमाडौं । भारतका प्रधानमन्त्री नरेन्द्र मोदी बिहीबार बिहान अतिक्रमित नेपाली भूमि कालापानी क्षेत्र पुगेर धार्मिक पूजापाठ गरेका छन् । जुन कुराको नेपाल सरकार बेखबर बनेको छ । 

मोदी आज बिहान भारतले अतिक्रमण गरेको नेपालको दार्चुला जिल्लाको कालापानी पुगेको कुरा जानकारी नभएको दार्चुलाका प्रमुख जिल्ला अधिकारी किरण जोशीले बताएकी छन् । मोदी हेलिकोप्टरबाट बिहान साढे ८ बजे अतिक्रमित नेपाली भूमि कुटी स्थित जोलिङकोङ उत्रिएका थिए । त्यसपछि उनले जोलिङकोङमा पूजापाठ गरेका छन् । उनले आजै कैलाश पर्वतको दर्शन गर्ने भएका छन् । भारतबाट तिब्बतको मानसरोवर पुग्न कालापानी छोटो दूरी मानिन्छ ।

मोदीले कैलाश दर्शनपछि नेपालको चुच्चे नक्सामा समेटिएको अतिक्रमित भूमि गुञ्जीमा स्थानीयसँग छलफल गर्ने कार्यक्रम रहेको भारतीय सञ्चारमाध्यमले जनाएका छन् । भारतले कालापानी, लिम्पियाधुरा, लिपुलेक क्षेत्र वर्षौंदेखि अतिक्रमण गर्दै आइरहेको छ । जुन क्षेत्रमा नेपाली भूमि कुटी, नावी, गुञ्जी गाउँ र भारतीय रोङकाङ, नपलच्यु, गब्र्याङ लगायत पर्दछ । मोदीले त्यस क्षेत्रमा विभिन्न सुरक्षा अधिकारीहरूसँग समेत छलफल गर्ने जनाएका छन् । 

सरकारले चुच्चे नक्साबारे अन्तर्राष्ट्रिय समुदायलाई जानकारी दिने प्रक्रिया अगाडि बढाइरहेको बेला मोदीले स्थानीय प्रशासनलाई समेत जानकारी नदिई भ्रमण गरेर नेपालप्रति पुनः एकपटक मिचाहा र अतिक्रमणकारी चरित्र देखाएको भन्दै देश भित्रबाट तीव्र असन्तुष्टि व्यक्त गर्ने क्रम सुरु भएको छ ।