सन्दीप लामिछानेविरुद्धको मुद्दाको पेशी फेरि सारियाे

२५ असोज, काठमाडौं । नेपाली राष्ट्रिय टिमका खेलाडी सन्दीप लामिछानेविरुद्धको बलात्कारसम्बन्धी कसुर मुद्दाको सुनुवाइको पेसी पुनः स्थगित सूचीमा परेको छ ।

मुद्दामा अन्तिम सुनुवाइ हुने क्रममा छ । तर बिहीबार सुनुवाइ नहुने जानकारी जिल्ला अदालत काठमाडौं प्रशासनले दिएको छ । न्यायाधीश अभावमा आज सुनुवाइ नहुने प्रशासनले जनाएको छ । मुद्दामा गत वैशाख २४ गते नै अन्तिम सुनुवाइ हुने भनिए पनि विविध कारण जनाउँदै पेस सार्दै आइरहेको छ ।

नुवाकोटकी एक नाबालिगलाई २०७९ भदौ ५ गते राति पिंगलास्थानस्थित होटल काठमाडौं इनमा पुर्याएर कुटपिट र बलात्कार गरेको अभियोगसहित लामिछानेविरुद्ध जिल्ला अदालत काठमाडौंमा मुद्दा दर्ता छ । मुद्दा अदालतले पुर्पक्षका लागि लामिछानेलाई जेल चलान गरेपनि उच्च र सर्वोच्चको आदेशमा २० लाख रूपैयाँ धराैटीमा रिहा भई बाहिरै बसेर मुद्दा लड्दै आइरहेका छन् ।