गोकर्णेश्वरमा प्रहरीद्वारा गोली प्रहार गरी लुटेरा समूह पक्राउ, घाइते घलानकाे उपचार हुँदै

२५ असोज, काठमाडौं । प्रहरीले गोली प्रहार गरी गोकर्णेश्वरबाट लुटेराको एक समुहलाई पक्रउ गरेको छ । काठमाडौ उपत्यका अपराध अनुसन्धान कार्यालयको टोलीले बिहीबार दिउँसो गोकर्णेश्वर नगरपालिका–९ जगडोलमा प्रहरीले गोली चलाएको हो । 

खबरपछि पुगेको प्रहरीमाथि लुटेरा समूहले गोली प्रहारको प्रयास गरेपछि आत्मरक्षाका लागि टोलीले २ राउण्ड गोली चलाएको प्रहरीको दाबी छ । प्रहरीको गोली लागेर सिन्धुलीको कमलामाई नगरपालिका २ का अन्दाजी ३६ वर्षीय अमर घलान घाइते भएको प्रहरीले जनाएको छ । उनकाे नेपाल मेडिकल कलेज अत्तरखेलमा उपचार भइरहेको जनाएको छ । 

समूहको २ सदस्यलाई एक थान पेस्ताेल र दर्जन संख्यामा गाेलीसहित प्रहरीले पक्राउ गरेको छ । उनीहरुमाथि बौद्ध प्रहरी वृत्तमा राखेर अनुसन्धान भइरहेको जनाइएको छ । पक्राउ पर्नेमा सर्लाहीका अन्दाजी ३६ वर्षीय शन्त लामा र सिन्धुपाल्चोकका अन्दाजी ३० वर्षीय जितेन लामा रहेकाे जनाइएकाे छ । उनीहरू चढेका दुईवटा मोटरसाइकल प्रहरीले बरामद गरेको बताइएकाे छ । अन्य २ जना भने फरार भएको प्रहरीले जनाएको छ। 

तातोपानी नाकाबाट तस्करी भएको सुन लुटपाटको सूचनामा आधारमा प्रहरी घटनास्थल पुगेको बताइएको छ ।