गाजामा बिजुली, पानी र स्वास्थ्य सामाग्रीको आपूर्ति रोक्ने निर्णयबाट इजरायल पछि नहट्ने

२५ असोज, काठमाडौं । इजरायलले हमास लडाकु समूहले बन्धक बनाएका आफ्ना नागरिक रिहा नगरेसम्म गाजा क्षेत्रमा बिजुली, पानी र इन्धनको आपूर्ति रोक्ने भएको छ । 

गत हप्तादेखि प्यालेस्टाइनको हमास लडाकुले १५० जनाभन्दा बढी इजरायलीलाई बन्धक बनाएका छन् । हमासबाट गाजा क्षेत्रमा भएको आक्रमणबाट १ हजार २०० इजरायलीको मृत्यु भएको र ३ लाख ३८ हजार बढी प्यालेस्टाइनी नागरिक विस्थापित भएका संयुक्त राष्ट्रसंघले जनाएको छ । 

बन्धक बनाइएका नागरिकको रिहाई नभएसम्म गाजामा बत्ती, पानी र इन्धन रोक्न निर्णय भएको इजरायलका उर्जामन्त्री इजराइल काट्जले सामाजिक सञ्जालमार्फत जनाएका छन् ।  ‘जबसम्म बन्धक बनाएका हाम्रा नागरिक रिहा हुँदैनन्, तबसम्म बिजुलीको स्वीच अन हुँदैन, पानीको पाइप खुल्दैन र इन्धन बोकेको ट्रक गाजामा जाँदैन’ उनले लेखेका छन् । 

गत शनिबार हमास लडाकुले हमला गरेकै दिन इजरायले बिजुलीको साथै, औषधि तथा पानीसहितका अत्यावश्यक सामग्रीको आपूर्ति बन्द गरिदिएको थियो । अस्पतालमा जेनेरेटर चलाउनका लागि पनि सिमित इन्धन मात्र रहेको स्थानीय अस्पताललाई उदृध गर्दै अन्तर्राष्ट्रिय संचारमाध्यमहरुले जनाएका छन् । 

यद्यपि, छिमेकी मुलुक इजिप्टले गाजामा अत्यावश्यक सामग्रीको ढुवानीका लागि ६ घन्टा युद्ध विराम गर्न आग्रह गरेको छ । इजरायली सेनाले गाजामा आक्रमण पनि जारी राखेको छ । 

आक्रमणका परी नेपालबाट कलेज इन्टर्न गर्न गाजा पुगेका ४९ विद्यार्थीमध्ये १० जनाको ज्यान गएको छ । अन्यलाई उद्धार गर्ने क्रम जारी राखेको छ । उद्धार गरिएकाहरुलाई नेपाल फर्काउन सरकारले वाइड बडी जहाज आज बिहान मात्र इजरायल पठाएको छ । अहिले त्यहाँको विमानस्थलमा नेपालीहरु नेपाल फर्कन इजरायलको तेल अबिब विमानस्थलमा पुगेर जहाज चढिसकेका छन् । भोलि बिहानसम्म २ सय ५० जनालाई काठमाडौं ल्याइपुर्याउने जनाइएको छ ।

मृतकको शव ल्याउन भने प्रक्रिया पुर्याउनु पर्ने भएका कारण केही दिन लाग्ने परराष्ट्र मन्त्रालयले जनाएको छ । शव इजरायल सरकारको नियन्त्रण राखिएको छ ।

यो पनि पढ्नुहोस