हजुरआमाकाे हत्यापछि साधुकाे भेषमा लुकिछिपी हिँडेका तोयानाथ १९ वर्षपछि प्रहरीको फन्दामा

२५ असोज, काठमाडौं । चितवनमा हजुरआमाको हत्यापछि साधुको भेषमा लुकिछिपी हिँडदै आइरहेका एक जना आरोपीलाई प्रहरीले पक्राउ गरेको छ ।

पक्राउ पर्नेमा भरतपुर महानगरपालिका वडा नं. २८ का तोयानाथ चापागाँई रहेको प्रहरीले जनाएको छ । हत्या घटनाको १९ वर्षपछि पक्राउ परेका उनी अहिले ४३ वर्षका छन् । घटनापछि उनले प्रहरीको आँखा छल्न हुलिया परिवर्तन गरेको खुलेको प्रहरीको दाबी छ । 

तोयानाथले २०६१ मंसिर १४ गते हजुरआमा नाता पर्ने मनकुमारीलाई बाँसको लौरो र ढुंगाले टाउकामा प्रहार गरेर हत्या गरी उनकाे साथमा रहेको गरगहना लुटेर फरार भएका थिए । विशेष सूचनाका आधारमा उनलाई चितवन प्रहरीले नवलपरासीको बर्दघाट नगरपालिका-४ स्थित शिव मन्दिरबाट मंगलबार पक्राउ गरेको जनाइएको छ । 

उनीमाथि जिल्ला अदालतबाट कर्तव्य ज्यान कसुरमा म्याद थप लिई अनुसन्धान भइरहेको प्रहरीले जनाएको छ ।