आममाफी पाएका ढकालविरुद्धको मुद्दाको सुनुवाइ रोकियो, अर्को इजलास गठन गरिने

२५ असोज, काठमाडौं । गुण्डा नाइकेको रुपमा परिचित रही ज्यान मुद्दामा जेल सजाय काटिरहेका अवस्थामा राष्ट्रपतिबाट सजायमा मिनाह पाएर रिहा भएका रिगल भनिने योगराज ढकालविरुद्ध सर्वाेच्च अदालतमा परेको मुद्दाको सुनुवाइ रोकिएको छ । 

प्रधानन्यायाधीश विश्वम्भरप्रसाद श्रेष्ठ, न्ययाधीश आनन्द प्रसाद भट्टराई र कुमार रेग्मीको पूर्ण इजलासमा बिहीबार सुनुवाइ सुरु भएकामा प्रन्या श्रेष्ठले मुद्दाको  ‘रिक्युजल’को घोषणा गरेका छन् । उनले यस्तै प्रकृतिको मुद्दामा आफूले यसअघि नै फैसला गरिसकेको कारण यो मुद्दा हेर्न नमिल्ने भन्दै प्रधानन्यायाधीशसहितको पूर्ण इजलासले अर्को इजलासमा पेस गर्न आदेश दिए । बिहान करिब ११ बजेवाट सुरु भएको बहस २ बजेसम्म चलेको थियो ।

अर्को इजलास गठन गरेर आगामी कार्तिक १४ गतेका पेशी तोक्न आदेश भएको छ । बाँकेको नेपालगन्जका चेतन मानन्धरको हत्यामा रिगल जिल्ला अदालतबाट २०७३ मा दोषी ठहर भई सर्वस्वसहित जन्मकैदको सजाय काटिरहेका बेला यही असोज ३ मा संविधान दिवसको अवसरमा राष्ट्रपति आममाफी पाएर रिहा भएपछि माफी निर्णय बदरको माग गर्दै मानन्धरकी पत्नि भारती शेर्पाले असोज १७ गते सर्वोच्चमा रिट दायर गरेकी थिइन् ।