झापामा प्रसाईंका समर्थकले महेश बस्नेतको गाडी फुटाए

२५ असोज, विराटनगर ।  नेकपा एमालेका पोलिटब्युरो सदस्य तथा पूर्व मन्त्री महेश बस्नेत प्रमुख अतिथि रहेको कार्यक्रममा सहभागी हुन आएका एमाले कार्यकर्ता चढेको गाडीमा दुर्गा प्रसाईंका समर्थक र पहिचानवादीको समूहले तोडफोड गरेका छन् ।

राष्ट्रिय युवा संघ अर्जुनधारा नगर कमिटीको प्रथम नगर  अधिवेशन उद्घाटन गर्न बस्नेत बिहीबार झापा पुगेका थिए ।  त्यस क्रममा उनलाई प्रदर्शनकारीले कालो झण्डा देखाउँदै विरोध गरेका थिए ।  

प्रदर्शनकारीले कार्यक्रम स्थल आसपास राखिएका गाडीमा ढुंगा प्रहार गर्दै सिसा फुटाइ दिएका छन् ।  घटनामा संलग्न भएको आरोपमा प्रहरीले बिक्रम सुब्बालाई नियन्त्रणमा लिएको छ ।  कार्यक्रम चलुञ्जेल अर्जुनधारा क्षेत्रमा पहिचानवादीले नारावाजी गरेका थिए । 

कार्यक्रम स्थलभन्दा ५०० मिटर टाढा पार्किङमा राखिएका एमाले नेताका २५ भन्दा बढी गाडीमा तोडफोड भएको बताइएको छ ।  त्यसबाट  करिब एक करोडको रूपैयाँ बराबरको क्षति भएको एमाले झापाको दाबी छ ।  प्रसाईंले काठमाडौंमा मोसो दलिएको घटनाको बदला लिने चेतावनी दिएका थिए ।