बालकृष्ण खाणसहितको रिट निवेदनमा सुनुवाइ दशैंपछि मात्र

२५ असोज, काठमाडौं । नक्कली भुटानी शरणार्थी प्रकरणमा चलाइएको मुद्दामा पुर्पक्षका लागि जेल चलान गरिएको काठमाडौं जिल्ला अदालतको आदेश बदरको माग गर्दै कांग्रेस नेता बालकृष्ण खाणसहित प्रतिवादीहरुको रिट निवदेनमाथि सुनुवाइ सरेको छ । 

सुनुवाइका लागि बिहीबार उच्च अदालत पाटनका न्यायाधीशद्वय गोकर्ण डाँगी र नारायणप्रसाद रेग्मीको इजलासमा तोकिएपनि सुनुवाइ हुन सकेन । यसअघिका इजलासले कैफियत प्रतिवेदन मगाउने आदेश भएकामा सोही प्रकरणसँग जोडिएको अर्को निवेदन पनि पेस भएकोले कैफियत प्रतिवेदन साथमा राखेर सुनुवाइ गर्ने आदेश गरेको छ । यो आदेशसँगै थुनामा रहेका प्रतिवादीहरुको अब दशैंअघि रिटको टुंगो लाग्ने आश समाप्त भएको छ ।

गत भदौ १२ र विभिन्न मितिमा रिट लिएर उच्च अदालतमा २० प्रतिवादी पुगेका छन् । खाण र रायमाझीसहित नरेन्द्र केसी, टेकनारायाण पाण्डे, सानु भण्डारी, आङटावा शेर्पा, डा ईन्द्रजीत राई, हरिभक्त महर्जन, लक्ष्मी महर्जन, सन्देश शर्मा, शम्शेर मियाँ, गोविन्द चौधरी, आशिष बुढाथोकी, सन्दीप रायमाझी, टेकनाथ रिजाल, केशवप्रसाद दुलाल, टंककुमार गुरुङ, सागर राई र रामशरण केसी जेलमा छन् । उनीहरुविरुद्ध ठगी, लिखत कीर्ते, राज्यविरुद्धको अपराध र संगठित अपराध कसुरमा मुद्दा लागेको छ ।