कोशीमा देखिएको विवादबारे छलफल गर्न कांग्रेसले बोलायो संसदीय दलको बैठक

२६ असोज, काठमाडौं । कोशी प्रदेशमा नेपाली कांग्रेसभित्र विवाद आएपछि यसबारे छलफल गर्न नेपाली कांग्रेसले संसदीय दलको बैठक बोलाएको छ । विहान ११ बजे बोलाइएको बैठकमा सत्ता गठबन्धनको निर्णयविपरित कोशी प्रदेशमा कांग्रेसका सांसद केदार कार्कीले मुख्यमत्रीका लागि दावी पेश गरेको विषयमा छलफल हुनेछ ।    

कोशी सरकार निमार्णको सबालमा नेपाली कांग्रेसको एउटा समुहले बिद्रोह गरेपछि आन्तरिक किचलो थप बढेको हो । जसका कारण एक अर्कालाई कारबाही गर्नेसम्मका कुरा सुरु भएका छन । कोशी सरकारको भावी नेतृत्वका लागि शेखर कोइराला पक्षधरले नेकपा एमालेको समर्थनमा केदार कार्कीले मुख्यमन्त्रीमा दावी गरे पछि कांग्रेसमा किचलो देखिएको हो । 

कार्की समुहले गरेको बिद्रोहका बारेमा निर्णय लिनका लागि कांग्रेस संसदीय दलको बैठक आज बोलाएको हो । कार्की समुहले संविधानको धारा १६८ को उपधारा ५ अनुसार सांसदलाई पार्टीको ह्वीप नलाग्ने भएकाले आफूहरूलाई कारबाही गर्न नसक्ने जनाउँदै आएका छन । 

त्यसमाथी, ओली सरकार माथी परमादेश दिदाँ नै ह्वीप नलाग्ने बिषयमा ब्याख्या भएको तर्क गर्दै कांग्रेस संसदीय दलले कारबाही गर्न नसक्ने भएकाले आजै कार्कीले मुख्यमन्त्री नियुक्ती हुने विश्वास ब्यक्त गरेका छन् ।