गैरीगाउँ हत्याकाण्डका आरोपी संजय भण्डारीविरुद्ध मुद्दा दायर, आजीवन काराबासको माग

२६ असोज, काठमाडौं । गत भदौ २९ गते काठमाडौंको गैरीगाउँमा ४ जनाको सामूहिक हत्या अभियोगमा सिन्धुपाल्चोक बाह्रबिसेका २३ वर्षीय सञ्जय भण्डारीविरुद्ध मुद्दा दायर भएको छ । सरकारी वकिल कार्यालयले भन्डारीलाई बाँचुञ्जेल जेल (आजीवन काराबास)को मागदाबीसहित काठमाडौं जिल्ला अदालतमा मुद्दा दायर गरेको हो ।

प्रहरीले आरोपी भण्डारीको साथबाट बरामद भएको कपडा र हतियारमा देखिएको रगतसँग मृतकहरूको डीएनए मिलेको अनुसन्धानबाट खुलेको बताइएको छ । व्यक्तिगत प्रतिशोध (रिसिइबी)का कारण हत्या भएको प्रहरीको निष्कर्ष छ ।

२५ दिन लामो अनुसन्धान सकेर बुधबार मात्र प्रहरीले रायसहितको प्रतिवेदन जिल्ला सरकारी वकिलको कार्यालयमा बुझाएको थियो । हट्टाकट्टा ज्यान भएका तर बोल्न नसक्ने भण्डारीको बयान दोभासेमार्फत लिइएको थियो ।

बयानका क्रममा सञ्जयले अन्य व्यक्तिको पनि हत्या गरेको बताएका थिए । उनले कालोपुल नजिक एक महिलाको हत्या गरेको बताएपनि पुष्टि हुन बाँकी रहेको प्रहरीको दाबी छ ।  अनुसन्धानका क्रममा प्रहरीले  ‘ब्रेन म्यापिङ’ अर्थात दिमागी अवस्था परीक्षण समेत गरेको थियो । उक्त परीक्षणमा भण्डारीको दिमाग सामान्यभन्दा तीक्ष्ण देखिएको थियो ।

घटनाबारे अनुसन्धान गर्न  काठमाडौं उपत्यका अपराध अनुसन्धान कार्यालयका प्रमुख प्रहरी वरिष्ठ उपरीक्षक सोमेन्द्रसिंह राठौरको नेतृत्वमा अनुसन्धान समिति बनाइएको थियो । भण्डारीले २९ गते राति करिब पौने १२ बजे गैरीगाउँको दिव्य काठ मिलमा दोलखाका पूर्णबहादुर भुजेल, उनकी श्रीमती अम्बिका भुजेल, कुमारकी आमा शुभद्रा भुजेल र मोरङ बेलवारी स्थायी घर भएका नवीन भन्ने विशाल राईको हत्या गरेको खुलेको छ ।

ईले केही समयपहिले भण्डारीलाई जडिबुटीमा मोटरसाइकलले ठक्कर दिएको र सो क्रममा कुटपिट समेत गरेको रिसिइबीमा पिछा गरेर पत्ता लगाइ हत्याको योजना बनाएको पाइएको छ । सो राईको हत्यापछि घटना बाहिरिने विश्वासमा मिलमा रहेका अन्य ३ जनाको पनि खुकुरी प्रहार गरी ज्यान लिएको खुलेको दाबी अभियोगपत्रमा गरिएको छ ।