लागत अनुमानभन्दा बढी प्रस्ताव आएपछि एमसीसी परियोजना अन्तर्गत प्रसारण लाइनका सबै ठेक्का रद्द

२६ असोज, काठमाडौं । मिलेनियम च्यालेन्ज एकाउन्ट (एमसीए) नेपालले एमसीसी परियोजना अन्तर्गतका प्रसारण लाइनका सबै ठेक्का रद्द गरेको छ । लागत अनुमान गरिएभन्दा बढी रकमको प्रस्ताव आएपछि यसलाई अस्वाभाविक भन्दै ठेक्का रद्द गरिएको एमसीए नेपालले जनाएको छ । एमसीए नेपालले शुक्रवार एक सूचना गरी गर्दै यी सबै ठेक्का रद्द भएको जानकारी दिएको छ । 

हालसम्म परेका प्रस्ताव लागत अनुमान भन्दा झण्डै दोब्बर भएको एमसीएको ठहर छ । एमसीए नेपालले यी ठेक्काहरुमा बोलपत्र पहिले गरिएको लागत अनुमानको तुलनामा बोलपत्रदाताहरुले अत्यधिक उच्च लागत प्रस्ताव गरेको भन्दै ठेक्का रद्द गरिएको जानकारी दिएको छ । अब प्रसारण लाइन परियोजनाको नयाँ टेन्डर आह्वान हुनेछ । 

टेन्डरमा सबैभन्दा कम प्रस्ताव नै लागत अनुमानभन्दा ६६ प्रतिशत उच्च भएपछि सो प्रक्रिया रद्द गर्ने प्रस्ताव एमसीए नेपालले गरेको थियो । यो प्रस्तावलाई एमसीसीको मुख्यालयले अनुमति दिएपछि ठेक्का रद्द गरिएको हो । एमसीए नेपालले ३ सय १५ किलोमिटर लामो प्रसारणलाइन परियोजनालाई तीन भागमा बाँडेर निर्माणका लागि बोलपत्र आह्वान गरेको थियो ।