संक्रमणकालीन न्यायसम्बन्धी विधेयककाे विराेधमा उत्रिएका अधिकारकर्मीहरू सिंहदरबार गेटबाट पक्राउ

२६ असोज, काठमाडौं । सरकारले संसदमा दर्ता गराएको संक्रमणकालीन न्यायसम्बन्धी विधेयक मानव अधिकार मैत्री बनाउन माग गर्दै मानवअधिकारवादीहरुले काठमाडौंमा प्रदर्शन गरेका छन् ।

शुक्रबार बिहान सिंहदरबारको दक्षिण गेट अगाडि प्रदर्शन गर्ने क्रममा प्रहरीले अधिकारकर्मी कृष्ण पहाडीसहित दर्जन बढी मानिसलाई पक्राउ गरेको छ । प्रदर्शनको नेतृत्व मानव अधिकार तथा शान्ति समाजले गरेको हो । 

पहाडी समाजका संस्थापक अध्यक्ष समेत हुन् । उनीहरुले प्लेकार्ड, ब्यानरसहित विरोध प्रदर्शन गरेका छन् । विधेयक २०६३ मंसिर ५ मा तत्काली सरकार र विद्रोही माओवादीबीच भएको विस्तृत शान्ति सम्झौताको मर्म अनुरुप पिडितलाई न्याय र पीडकलाई सजाय सुनिश्चित गर्नु पर्ने माग राखेका छन् । जनयुद्ध सुरु भएको दिन फागुन १ मा दिइने सार्वजनिक बिदा खारेज हुनुपर्ने माग समेत गरेका छन् । 

प्रहरीले भने निषेधित क्षेत्र तोडेका कारण पक्राउ गरिएको जनाएको छ । पक्राउ परेकाहरुलाई सिंहदरबारस्थित प्रहरी वृत्तमा लगिएको छ । विधेयक हाल संसदीय समितिमा छलफलका क्रममा रहेको छ । छलफलमा एमालेले विधेयकका धेरै कुरा संशोधन हुनुपर्ने अडान राखेका छन् । समाजले कुशासन र दण्डहीनता विरुद्ध असोज २१ गते देखि १० बुँदे मागसहित अभियान संचालन गरिरहेको छ ।