थारु समुदायले संविधानलाई पूर्णरुपमा स्वीकार गरेको छैन : सांसद चौधरी

२६ असोज, काठमाडौं । नागरिक उन्मुक्ति पार्टाी (नाउपा)का सांसद गंगाराम चौधरीले थारु समुदायले संविधान पूर्णरुपमा स्वीकार गरिनसकेको बताएका छन् । प्रतिनिधिसभाको बैठकमा बोल्दै सांसद चौथरीले नाउपाले थारु समुदाय मात्र नभई सम्पूर्ण नेपालीको पूर्ण अधिकारका लागि लडिरहेको बताए । 

उनले पार्टीका संरक्षक रेशमलाल चौधरीको आममाफी रिहाईलाई व्यक्ति हत्याका दोषी योगराज ढकाल ‘रिगल’सँग नजोड् समेत आग्रह गरे । रेशमलाल कैलालीको टिकापुर घटनासँग जोडिएर जेल परेको तर ढकाल व्यक्ति हत्यामा जेल परेका कारण दुई घटना फरक रहेको बताए । उनले टिकापुर घटना राजनीतिक भएको उनको भनाइ छ ।

रेशमलाल ७ प्रहरी र एक बालकको जयन जाने गरी २०७२ साउन ७ मा भएको टिकापुर घटनाका मुख्य योजनाकारको रुपमा जिल्ला, उच्च र सर्वोच्च अदालतबाट ठहर भई जेल सजाय काटिरहेका बेला गत जेठ १५ मा गणतन्त्र दिवसको अवसरमा राष्ट्रपतिबाट बाँकी सजाय माफी पाएर रिहा भएका थिए । 

यस्तै बाँके नेपालगन्जका ढकाल सोही ठाउँका चेतन मानन्धरको हत्यामा जिल्ला अदालतबाट दोषी ठहर भई बाँके कारागारमा कैद भुक्तान गरिरहेका बेला यही असोज ३ मा संविधान दिवसको अवसरमा राष्ट्रपतिबाट बाँकी सजाय माफी पाएर रिहा भएका थिए । नेपाली कांग्रेस निकट तरूण दलका नेता समेत रहेका ढकाल सर्वस्वसहित जन्मकैद सजाय भाेगिरहेका थिए ।

त्यसपछि राजनीतिक दल, अधिकारकर्मीहरुले चौधरी र ढकाललाई माफी दिने निर्णय संविधानविपरीत भएको भन्दै सरकारको आलोचना गर्दै आइरहेका छन् । २०७२ असाेज ३ मा संविधान जारी हुनु पूर्व थरूहट स्वायत्ता क्षेत्रकाे माग गर्दै कैलाली लगायत जिल्लाका थारू समुदायले तत्कालीन थरूहट कल्याणकारिणी सभाकाे नेतृत्वमा  टिकापुरमा भीषण प्रदर्शन हुँदा घटना भएकाे थियाे ।

यद्यपि आममाफी पाएर जेलमुक्त भएका ढकालकाे रिहाइविरूद्ध सर्वाेच्च अदालमा मुद्दा चलिरहेकाे छ । हत्या गरिएका मानन्धर पत्नी भारतीले मुद्दा हालेकी हु्न् ।