कंगोमा तैनाथ शान्ति सैनिक भुपजित राईको मृत्यु

२६ असोज, काठमाडौं । संयुक्त राष्ट्रसंघको आह्वानमा शान्ति स्थापना कार्यका लागि कंगोमा खटिएका नेपाली एक शान्ति सैनिकको मृत्यु भएको छ । नरसिंहदल गण (शान्ति सेना) २९औं डफ्फामा कार्यरत प्युठ भुपजित राईको शुक्रबार मृत्यु भएको सैनिक जनसम्पर्क तथा सूचना निर्देशनालयले जनाएको छ ।

खोटाङको फक्टाङ्ग गाउँपालिका–८ का राई उक्त गण अन्तर्गत टयाक्टिकल अपरेटिङ बेस जिनामा कार्यरत रहँदा बिरामी भएका थिए । थप उपचारका क्रममा कंगोको बुनियास्थित मोरोक्कन लेभल–२ अस्पतालमा उनको मृत्यु भएको जनाएको छ । 

राईको पार्थिव शरीर स्वदेश ल्याउन आवश्यक समन्वय भइरहेको जानकारी समेत निर्देशनालयले दिएको छ । द्वन्द्वग्रष्त मुलुकमा खटिएका नेपाली शान्ति सेनाको विश्वभरबाट प्रसंशा हुँदै आएको छ । 

नेपाल सरकारले हरेक वर्ष ६ देखि ८ हजारकाे संख्यामा शान्ति सेना पठाउँदै आएकाे छ । शान्ति सेनाकाे माग संयुक्त राष्ट्र संघले गर्ने गरेकाे छ ।